Cinayət yolu ilə əldə edilmiş əmlakı leqallaşdırmaqda təqsirləndirilən Rüfət Nurəddin oğlu Kərimovun cinayət işinin maraqlı təfərrüatı məlum olub. Kərimovun adına xeyli sayda MMC olub. Onun dövlət qurumlarının əməkdaşları ilə cinayət əlaqələrinə girdiyi müəyyən edilib.
1xeber.media xəbər verir ki, Rüfət Kərimov 2017-2022-ci illər ərzində təsisçisi və faktiki rəhbəri olduğu çoxsaylı şirkətlərə dövlət qurumları və onlara aid müəssisələr tərəfindən müxtəlif təyinatlarla köçürülmüş ümumilikdə 206 min manat məbləğində pul vəsaitini qanuni görüntü yaratmaq üçün formal əqdlər bağlamaq yolu ilə mənimsəyib.
Rüfət Kərimov cinayət yolu ilə əldə edilən həmin pul vəsaitini leqallaşdırmaqda ittiham olunub.
O, Cinayət Məcəlləsinin 179.3.2 (külli miqdarda mənimsəmə), 193-1.3.2 (cinayət yolu ilə əldə edilmiş əmlakı leqallaşdırma xeyli miqdarda törədildikdə) və 313-cü (vəzifə saxtakarlığı) maddələri ilə ittiham edilib.
Məhkəmənin hökmü ilə Rüfət Kərimov şərti cəza alaraq azadlıqda qalıb.
İşin təfərrüatına gəlincə, Rüfət Kərimovun nəzarətində 74 MMC olub. Ayrı-ayrı şəxslərin adına açılan həmin MMC-lərə faktiki rəhbərliyi Kərimov edib.
R.Kərimov həmin MMC-lər vasitəsi ilə dövlət qurumlarında keçirilən formal tenderlərdə iştirak edib və qalib olub. Malların qiyməti bazar qiymətindən yuxarı göstərilib və əldə edilən pul həmin rəsmi qurumların əməkdaşları ilə R.Kərimov arasında bölüşdürülüb.
Rüfət Kərimov aşağıdakı vəzifəli şəxslərlə əlbir olaraq qalib olduğu tenderlərdə rəqəmləri bazar qiymətindən yuxarı göstərərək bu qədər məbləği ələ keçirib:
– Elmlər Akademiyasınının Nizami Gəncəvi adına Ədəbiyyat institutunda ümumi işlər üzrə direktor müavini ilə 26 min manat;
– Səhiyyə Nazirliyinin Respublika QİÇS-lə Mübarizə Mərkəzinin mühasibi ilə 77 min manat;
– Elm və Təhsil Nazirliyinin Sağlamlıq imkanları məhdud, valideyn himayəsində məhrum olmuş uşaqlar üçün 4 nömrəli xüsusi internat məktəbinin direktoru ilə 2500 manat;
– Elm və Təhsil Nazirliyinin Sağlamlıq imkanları məhdud uşaqlar üçün 12 nömrəli xüsusi internat məktəbinin sabiq baş mühasibi ilə 3100 manat;
– Elm və Təhsil Nazirliyinin 8 nömrəli sanatoriya tipli internat məktəbinin baş mühasibi ilə 5400 manat;
– Elm və Təhsil Nazirliyinin Valideyn himayəsindən məhrum olmuş uşaqlar üçün 2 nömrəli ümumi internat məktəbinin direktoru ilə 4000 manat;
– Abşeron rayon icra hakimiyyəti başçısının Pirəkəşkül kənd inzibati ərazi dairəsi üzrə nümayəndəsi ilə 1800 manat;
– Dövlət Rəssamlıq Akademiyasında Texniki-istismar və təsərrüfat şöbəsinin müdiri ilə 7 min manat;
– Dövlət Akademik Opera və Balet Teatrının direktor müavini ilə 26 min manat;
– Elmlər Akademiyasınının Füzuli adına Əlyazmalar institutunun elmi işlər üzrə direktor müavin ilə 18 min manat;
– Azərbaycan Milli Elmlər Hüseyn Cavidin ev muzeyinin direktoru ilə 12 min manat;
– Naftalan şəhər bələdiyyəsinin sədri ilə 4 min manat;
– Səhiyyə Nazirliyinin Respublika Uşaq Sanatoriyasının baş həkimi ilə 4400 manat;
– Səhiyyə Nazirliyinin “Professor Gindes adına respublika uşaq və yeniyetmələr üçün vərəm sanatoriyasının direktoru ilə 4300 manat;
Səhiyyə nazirliyinin iki qurumunun direktpru ilə əlbir olara q 10 min manat.
Qeyd edək ki, bu şəxslər barəsində cinayət təqibinə bəraətverici əsaslar olmadan xitam verilib.
Təqsirləndirilən şəxs Kərimov ifadəsi özünü təqsirli bilib, zərəri tam ödədiyini deyib.Musavat.com
