Həcc ziyarətinin başlamasına sayılı günlər qalıb. Belə ki, ilk zəvvarların yola düşməsi 24-25 may tarixlərinə təsadüf edəcək. Digər tərəfdən, ziyarət üçün müəyyən olunan qiymətin – 5950 dolların çox olduğu bildirilir. Qeyd edilir ki, Özbəkistan (1500 dollar) və Qazaxıstanda (4500 dollar) qiymətlər bizdən daha ucuzdur.
Azərbaycanda Həcc ziyarətinə getmək niyə baha başa gəlir?
1xeber.media xəbər verir ki Globalinfo.az bununla bağlı Qafqaz Müsəlmanlar İdarəsinə (QMİ) sorğu ünvanlayıb.
QMİ-nin xarici əlaqələr şöbəsinin müdiri Vüsal Cahangiri digər ölkələrdə Həcc ziyarətinə gedişin Azərbaycandan çox ucuz olmasını mümkünsüz adlandırıb:
“Qazaxıstanda yəqin ki, hansısa paket 4500 dollaradır. Özbəkistandan isə Həcc ziyarətinə gedişin 1500 dollara olması mümkün deyil. Bu, Ümrə ziyarətinin qiyməti ola bilər. Hətta məbləğ 1500-dən çoxdur. Avropadan gediş ümumiyyətlə, 10-12 min dollar təşkil edir. Həm də şərtlərə baxmaq lazımdır. Görün, onların olduğu otel harda yerləşir, otaqda neçə nəfər birlikdə qalır və sair. Qeyd edim ki, beş zonanın hər birinin qiyməti fərqlidir. Kəbədən 5 kilometr aralı məsəfədə yerləşən oteldə, bir otaqda 5-6 adamla qalmaqla, Kəbəyə yaxın, 2-3 nəfərlə birlikdə qalmaq eyni şey deyil. Belə olduqda, əlbəttə, qiymət fərqli olacaq”.
QMİ rəsmisi bildirib ki, Azərbaycanda məişət məsələsi ilk yerdə dayanır:
“Xalqımız təmizliyi, rahatlığı sevir, otaqda 3 nəfərdən artıq adamın olmasını istəmir. Bəzi ölkələrdən gələn zəvvarlar daşın üstündə yatsa da, bu, onlar üçün normaldır. Biz axı buna razı olmarıq. Ona görə də çalışırıq ki, yemək də, xidmət də yüksək səviyyədə olsun. Zəvvarlar seçdiyimiz oteldən, açıq süfrədən razıdırlar. Qiymətlərin Azərbaycan zəvvarı üçün əlçatan olmasının tərəfdarıyıq”.
