“Aprel ayında yağan intensiv yağışlardan sonra evlərimizi su basıb. Bütün otaqlar, zirzəmi, həyət dizə qədər palçığın içərisindədir. Yaşamağa şərait olmadığına görə kənd sakinləri evlərini tərk edib Yaşmada, Tağıyev qəsəbəsində, digər yaxın ərazilərdə kirayədə və ya qohumlarının evində məskunlaşıblar”.
1xeber.media xəbər verir ki, bu şikayətlə “Qafqazinfo”ya Xızı rayonunun Sitalçay kəndinin bir qrup sakini müraciət edib.
Onların sözlərinə görə, dəfələrlə aidiyyəti qurumlara müraciət olunsa da, problem aradan qalxmayıb: “Bizim kənddə 70-ə yaxın ev yaşanılmayacaq vəziyyətdədir. Bəzi evlərdən suları çəkiblər, amma hamısına köməklik olunmayıb. İcra nümayəndəliyindən ancaq gəlib aktlaşdırıb gediblər, artıq 16 gündür ki, bu vəziyyətdəyik, bütün evimiz, təsərrüfatımız su, palçıq altındadır. Dərdimizlə maraqlanan yoxdur...”
Vətəndaşlar evə dolan suyun məişət əşyalarını sıradan çıxardığını, onlara həm də ciddi maddi ziyan dəydiyini əlavə edirlər.
Problemlə bağlı Xızı Rayon İcra Hakimiyyəti ilə əlaqə saxladıq. Qurumun Sənədlərlə və vətəndaşların müraciətləri ilə iş şöbəsindən sorğumuza cavab olaraq bildirildi ki, təkcə Sitalçayda deyil, digər kəndlərdə də sözügedən problemdən xəbərdardırlar: “Apreldəki güclü yağışlardan sonra Xızının Sitalçay, Yaşma və Giləzi kəndlərində 150 evi su basmışdı. Bütün su dolan evlərdən suyun çəkilməsi ilə bağlı sakinlərə köməklik olunub. Bütün evlər alktlaşdırılıb və aidiyyəti üzrə Fövqəladə Hallar Nazirliyinə təqdim olunub”.
Fövqəladə Hallar Nazirliyindən isə sorğumuza belə cavab aldıq: “Mövcud qanunvericiliyə, o cümlədən “Yerli icra hakimiyyətləri haqqında Əsasnamə”yə əsasən, göstərilən məsələ Fövqəladə Hallar Nazirliyinin deyil, yerli icra hakimiyyət strukturları, o cümlədən su-kanalizasiya təchizatı qurumlarının vəzifələrinə aiddir”.
Xatırladaq ki, Azərbaycanda aprelin 16-da aramsız leysan yağışı yağıb, sel suları paytaxtla yanaşı, əksər rayonlarda ciddi fəsadlara yol açıb.
