Azərbaycanda bəzi aztəminatlı ailələrə müavinət verilir.
1xeber.media xəbər verir ki, bu, ailənin ünvanlı sosial yardım almaq hüququ olduqda təyin olunur.
Müavinət uşağın bir yaşı tamam olan ayın sonunadək verilir və məbləği 100 manatdır.
Sosial müavinətin təyin olunması üçün şəxs müavinət almaq hüququ yarandıqdan sonra yaşayış yeri üzrə Dövlət Sosial Müdafiə Fondunun (DSMF) struktur bölməsinə, “DOST” mərkəzinə müraciət edə bilər.
Müraciətə qeydə alındığı gündən ən geci 10 gün müddətində baxılır və müvafiq qərar qəbul edilir. Müavinətin təyin olunmasından imtina edilməsi barədə qərar qəbul edildikdə, 5 gün müddətində imtinanın səbəbləri göstərilməklə, şəxsə rəsmi məlumat verilir. Paralel olaraq, vətəndaşın bu qərardan inzibati qaydada yuxarı səlahiyyətli orqana, vəzifəli şəxsə və məhkəməyə şikayət etmək hüququ var.
Hazırda bu müavinət hər hansı bir dövlət qurumuna müraciət edilmədən, sənəd təqdim edilmədən proaktiv qaydada təyin edilir. Mərkəzləşdirilmiş elektron informasiya sistemindən (MEİS) məlumatların əldə edilməsi mümkün olmadıqda nəzərdə tutulan sənədlər tələb edilir. Bunlar – müraciət edən şəxsin şəxsiyyətini təsdiq edən sənədin surəti, uşağın doğum haqqında şəhadətnaməsi və şəxsiyyət vəsiqəsinin surətidir.
Qeyd edək ki, müavinət almaq hüququ olanlar – Azərbaycan vətəndaşları, ölkəmizin tərəfdar çıxdığı beynəlxalq müqavilələrdə başqa hal nəzərdə tutulmayıbsa, Azərbaycan ərazisində daimi yaşayan vətəndaşlığı olmayan şəxslər və əcnəbilərdir.
