Bakı Şəhər İcra Hakmiyyətinin tabeliyində fəaliyyət göstərən “Bakı Şəhər Əsaslı Tikinti və Təmir” MMC 3 satınalma müsabiqəsinə yekun vurub.
1xeber.media Qaynarinfo-ya istinadən xəbər verir ki, müsabiqələr Bakı şəhəri ərazisində səkilərdə, həyətlərdə, park və bağlarda abadlıq və yenidənqurma işlərinin layihə-smeta sənədlərinin hazırlanması, Bakı şəhəri ərazisində dövlət mənzil fonduna aid binaların təmiri işlərinin layihə-smeta sənədlərinin hazırlanması və Roma papası II İohann Pavel adına katolik kilsə binasının layihə-smeta sənədlərinin hazırlanması ilə bağlı keçirilib.
Maraqlıdır ki, hər üç tenderin qalibi “Az.Arxitektura” şirkəti seçilib. Tərəflər arasında bağlanacaq satınalma müqavilələrinin maliyyə dəyəri müvafiq olaraq 3 030 582,2 manat, 980 462 manat və 647 712 manat təşkil edir. Beləliklə, “Bakı Şəhər Əsaslı Tikinti və Təmir” MMC “Az.Arxitektura” şirkətinə toplam olaraq 4 658 736, 2 manatlıq sifariş verib.
“Az.Arxitektura” MMC 2019-cu ildə qeydiyyata alınıb. Şirkət 10 manatlıq nizamnamə kapitalı ilə təsis edilib. 2021-ci ildə şirkətin nizamnamə kapitalı 5010 manata qədər artırılıb. Hüquqi ünvanı Bakı şəhəri Binəqədi rayonu, mikrorayon 7, ev 29 A, 1260-cı keçid,1-ci giriş, 1-ci mərtəbə ünvanında yerləşən şirkətin qanuni təmsilçisi Şükürlü Yunis Sahib oğludur. Açıq mənbələrdə şirkət və qanuni təmsilçisi haqqında heç bir məlumata rast gəlinmir.
Dövlət satınalmalarının vahid internet portalı üzərindən apardığımız araşdırma nəticəsində məlum olub ki, “Az.Arxitektura” MMC daha çox “Bakı Şəhər Əsaslı Tikinti və Təmir” MMC-nin keçirdiyi tenderlərin qalibi olur. Ötən il şirkət “Bakı Şəhər Əsaslı Tikinti və Təmir”in 2 470 511,66 manatlıq üç tenderinin qalibi olub. Bu da şirkətlə sözügedən MMC arasında hansısa bağlılığın olmasına şübhələri artırır.
“Bakı Şəhər Əsaslı Tikinti və Təmir” MMC Eldar Əzizov Bakı Şəhər İcra Hakimiyyətinin başçısı təyin edildikdən sonra yaradılıb. Daha dəqiqi MMC 2019-cu ildə təsis edilib. “Az.Arxitektura” şirkəti də sözügedən MMC ilə eyni ildə yaradılıb və dərhal da satınalma müsabiqələrinə qatılmağa başlayıb.
“Bakı Şəhər Əsaslı Tikinti və Təmir” MMC-nin rəhbəri Abit Əliyevdir. O, Eldar Əzizovun yaxın adamı kimi tanınır. Eldar Əzizov hələ Gəncənin icra başçısı vəzifəsində çalışarkən Abit Əliyev onunla işləyib. Eldar Əzizov 2018-ci ildən Bakıya rəhbərlik edir.
