Televiziyalarda ailə həyatına müdaxilə halları ilə bağlı Ali Məhkəmə tərəfindən qərar qəbul edəcəyi gözlənilir. Bununla bağlı Ali Məhkəmənin Kollegiyasının sədri Sənan Hacıyev tədbirlərin birində çıxışı zamanı deyib:
“Media məkanında şəxslərin şərəf və ləyaqətinin müdafiəsi məsələlərinə müəyyən qədər diqqət ayrılsa da, təəssüf ki, vətəndaşların şəxsi həyatının toxunulmazlığı, şəxsi və ailə sirri kimi konstitusion hüquqlarının qorunması ilə bağlı vəziyyət heç də ürəkaçan deyil".
O bildirib ki, bütün bunlar nəzərə alınaraq, bu istiqamətdə müvafiq hüquqi tənzimləmənin həyata keçirilməsi məqsədilə yaxın vaxtlarda Ali Məhkəmə tərəfindən mühüm qərarların qəbulu nəzərdə tutulub.
Bildiyimiz kimi, kütləvi informasiya vasitələrinin işi “Media haqqında” Qanunla tənzimlənir. Həmçinin, ölkədə senzuranın tətbiqi uzun illərdir qadağan edilib.
Bəs maraqlıdır ki, Ali Məhkəmənin bununla bağlı qərarı senzuraya səbəb olmayacaq ki?
Mövzu ilə bağlı Bizim.Media-ya danışan media tənqidçisi, professor Qulu Məhərrəmli deyib ki, Ali Məhkəmənin bu məsələyə hansı aspektdən yanaşacağı bizə də maraqlıdır:
“Ümumiyyətlə, bizim bəzi telekanallar reytinq, reklam xatirinə verilişlərdə ailə problemlərini həddindən artıq çılpaqlıqla göstərməyə çalışırlar. Bu da ictimaiyyətdə narazılıq doğurur. Bunun üçün hansısa Ali Məhkəmənin qərarına ehtiyac yoxdur. Çünki “Media haqqında” Qanunda ailə, şəxsi həyata müdaxilənin yolverilməzliyi barədə çox aydın yazılıb”.
O, Ali Məhkəmənin bununla bağlı Milli Məclisə təklif verə biləcəyini də qeyd edib:
“Ali Məhkəmənin hansı rakursdan məsələyə yanaşması aydın deyil. Bəlkə də Milli Məclisə təkliflər verə bilər. Amma hüquqi mexanizm məsələsi var. Hər halda problemin özü onu göstərir ki, ekranda elə məsələlər çılpaqlıqla verilir ki, bu, məhkəmə orqanlarını da narahat edir”.
