Yasamal Rayon İcra Hakimiyyəti, Yeni Azərbaycan Partiyası Yasamal rayon təşkilatı və Azərbaycan Milli Konservatoriyasının birgə təşkilatçılığı ilə Ümummilli lider Heydər Əliyevin anadan olmasının 102-ci ildönümü ilə əlaqədar “Heydər Əliyevin şah əsəri- müstəqil Azərbaycan” adlı tədbir keçirilib.
1xeber.media xəbər verir ki, tədbirdən öncə iştirakçılar Azərbaycan Milli Konservatoriyasının foyesində Ulu Öndərin büstü önünə gül düzərək əziz xatirəsini yad ediblər.
Tədbirdə Yasamal Rayon İcra Hakimiyyətinin başçısı Elşad Həsənov, Yeni Azərbaycan Partiyası Yasamal rayon təşkilatının sədri Bəxtiyar Nəbiyev,Milli Məclisin deputatları Ülvi Quliyev, Göydəniz Qəhrəmanov, Erkin Qədirli, hüquq-mühafizə orqanlarının rəhbərləri, şəhid ailələrinin üzvləri, qazilər, ali təhsil məktəblərinin rektorları, ziyalılar, rayon bələdiyyəsi, səhiyyə müəssisələrinin rəhbərləri və ictimaiyyət nümayəndələri iştirak ediblər. Tədbirdə Dövlət Himni səsləndirilib,Ulu Öndərin və şəhidlərin ruhu bir dəqiqəlik sükutla yad edilib.
Tədbiri giriş sözü ilə açan Azərbaycan Milli Konservatoriyasının rektoru Kamilə Dadaş-zadə tədbir iştirakçılarını salamlayıb və Ulu Öndərin xalqımızın tarixində oynadığı əvəzolunmaz rolundan söhbət açıb.
Daha sonra çıxış edən Yasamal Rayon İcra Hakimiyyətinin başçısı Elşad Həsənov qeyd edib ki, Ulu Öndərin zəngin həyat yolu, xalqına və dövlətinə göstərdiyi misilsiz xidmətləri hər bir azərbaycanlı üçün əsl fədakarlıq və vətənpərvərlik nümunəsidir.Ulu Öndər ömrünü xalqına həsr etmişdir. Onun hakimiyyətdə olduğu bütün dövrlərdə — istər sovet dövründə, istərsə də müstəqillik illərində- həyata keçirdiyi siyasət Azərbaycanı sabitliyə, inkişaf və tərəqqiyə aparan yolun əsasını qoydu. Məhz onun uzaqgörənliyi və dəmir iradəsi sayəsində ölkəmiz 90-cı illərin ağır sınaqlardan keçərək bu günkü güclü və müasir dövlətə çevrilib.
İcra hakimiyyətininin başçısı vurğuladı ki, Yasamal rayonu olaraq biz də Heydər Əliyev irsinin qorunmasına və gələcək nəsillərə ötürülməsinə xüsusi önəm veririk. Onun müəyyən etdiyi inkişaf strategiyası bu gün Azərbaycan Respublikasının Prezidenti cənab İlham Əliyev tərəfindən uğurla davam etdirilir. Bu strategiyanın nəticəsidir ki, ölkəmiz regionun lider dövləti kimi çıxış edir və beynəlxalq aləmdə güclü söz sahibinə çevrilmişdir.
Daha sonra Yasamal Rayon İcra Hakimiyyətinin Ulu Öndərin ömür yolundan bəhs edən filmə baxış keçirildi. Tədbirdə Ümummilli Lider Heydər Əliyev dühasından, onun xalqımız qarşısında xidmətlərindən , böyüklüyündən, onun xalqımızın rifahı naminə həyata keçirdiyi mühüm tədbirlərin mahiyyətindən bəhs olundu, zaman keçdikcə bu dahi insanın adı Azərbaycan xalqının simvoluna, əməlləri isə hünər rəmzinə çevrilməsindən danışıldı.Tədbir incəsənət ustalarının ifasında konsert proqramı ilə davam etdirildi.
