“Allah Ulu Öndər Heydər Əliyevə rəhmət eləsin! Onunla dəfələrlə görüşmüşəm. İnsanlara xoş münasibət göstərərdi”.
1xeber.media xəbər verir ki,bu sözləri Globalinfo.az-a Bilgəh ağsaqqalı, sabiq deputat Qalib Salahzadə (Hacı Qalib) deyib.
Heydər Əliyevlə bağlı xatirələrini bölüşən Hacı Qalib onunla tanışlığından söz açıb:
“Böyük alim və görkəmli ictimai-siyasi xadim Cəlal Əliyevlə (Heydər Əliyevin qardaşı – red.) 18 yaşımdan dostluq edirdim. Nə vaxt Heydər Əliyev onun bağına gəlsə, məni də çağırardı. Özü də həmişə deyərdi ki, kişi gəlib, gəl çay içək. Mən də tez gedərdim. Allah hər ikisinə rəhmət eləsin”.
Hacı Qalib Salahzadə Heydər Əliyevin onu həbsdən qurtardığını bildirib:
“Günlərin bir günü keçmiş prokuror Zakir Qaralov şəxsi münasibət zəminində məni Şüvəlan həbsxanasına saldırdı. Cəlal Əliyev bunu Heydər Əliyevə demişdi. Ulu Öndər də Zakir Qaralova sual verib ki, sən Qalib Salahzadəni niyə həbs etdirmisən? Qayıdıb o da cavab verib ki, guya polisə şillə vurmuşam. Heydər Əliyev də adamları yaxşı tanıyırdı. Zakir Qaralova yalan danışmamağı tövsiyə etmişdi və tapşırmışdı ki, Hacı Qalibi bu gün buraxdır. Heç tapşırıqdan iki saat keçmədi, azadlığa çıxdım. Doğrudan da heç kimi vurmamışdım. Kim Heydər Əliyevlə dostluq edibsə, xeyrini görüb”.
