Rusiyalı siyasi şərhçi Tatyana Stanovaya Rusiya Prezidenti Vladimir Putinin Ukrayna ilə birbaşa sülh danışıqları təklifi ilə bağlı fikirlərini bölüşüb.
Politoloq bildirib ki, Moskvanın bəyanatları sülhə real maraqdan daha çox, siyasi taktikanı əks etdirir.
Stanovaya hesab edir ki, hazırda nə Rusiya, nə də Ukrayna uzunmüddətli atəşkəs və ya barış üçün həqiqi addım atmağa hazırdır. Onun fikrincə, tərəflərin mövqeləri bir-birindən köklü şəkildə fərqləndiyi üçün kompromis mümkün görünmür.
Putinin birbaşa danışıqlara razılıq verməsi, Stanovayanın fikrincə, ABŞ-ı “sülh prosesindən” uzaqlaşdırmamaq məqsədi daşıyır. Xüsusilə, Donald Trampın mümkün qayıdışı fonunda Moskva Qərblə münasibətlərin "normallaşması" gündəmindən tamamilə çıxmaq istəmir.
Siyasi analitik bildirir ki, bu təkliflər Putinin geri çəkilməyə və ya mövqeyini dəyişməyə hazır olduğunu göstərmir. Əksinə, o, 2022-ci ilin yazında baş tutmamış danışıqların yeni mərhələsini – “İstanbul-2”ni – gündəmə gətirmək istəyir. Məqsəd Ukraynaya silah tədarükünü dayandırmaq və ölkə daxilindəki fikir ayrılıqlarını istismar etməkdir.
"Həqiqət budur ki, nə Moskva, nə də Kiyev sülhə razı deyil. Davamlı razılaşma yalnız daxili dəyişikliklər baş verərsə və ya hərbi sahədə ciddi dönüş olarsa mümkün ola bilər", - o qeyd edib.
Ekspertin qənaətinə görə, nə qədər ki, bu şərtlər yoxdur, heç bir beynəlxalq təzyiq – hətta Trampın dediyi kimi “dünyanın ən dəhşətli sanksiyaları” – Putini planlarından çəkindirməyəcək. Rusiya üçün ya müharibə, ya da Ukraynanı təslim olmağa məcbur etmək əsas hədəf olaraq qalır.
modern.az
