2022-ci ildən etibarən ölkə üzrə yaşayış və qeyri-yaşayış sahələrinin alışı zamanı ödənilən əlavə dəyər vergisinin (ƏDV) bir hissəsinin geri qaytarılması prosesi tətbiq olunur. Mövcud qaydalara əsasən, vətəndaşlar mənzil alarkən ödədikləri ƏDV-nin 30 faizini geri ala bilirlər.
Sosial şəbəkələrdə istifadəçilər yeni avtomobil alışı zamanı da ƏDV-nin müəyyən hissəsinin geri qaytarılması təklifini irəli sürürlər.
Bəs belə bir qaydanın avtomobillərə də şamil olunması nə dərəcədə mümkündür? Avtomobil alarkən ƏDV-nin geri qaytarılması vətəndaş hüququ kimi tanınmalıdırmı?
Mövzu ilə bağlı hüquqşünas Tağı Hüseynov KONKRET.az-a açıqlamasında bildirib ki, Azərbaycanda vətəndaşlar arasında ölkədaxili alqı-satqı zamanı ƏDV-nin geri qaytarılması tətbiq olunmur.
“Lakin distribyutorlar vasitəsilə (Toyota markalı avtomobil şirkətdən birbaşa alındıqda – red) ƏDV ödənilir. Avtomobil gömrük rəsmiləşdirilməsindən keçdikdən və gömrük möhürü vurulduqdan sonra, alıcı həmin şirkətə müraciət edərək ƏDV-nin geri qaytarılmasını tələb edə bilir”.
Vəkil qeyd edib ki, bu qayda yalnız rəsmi distribyutorlar və hüquqi şəxslər arasında aparılan əməliyyatlara aiddir.
“Vətəndaşlar arasında birbaşa alqı-satqı zamanı isə ƏDV-nin geri qaytarılması mümkün deyil”.
