“Dövlət Sosial Müdafiə Fondu (DSMF) bu ilin ilk 4 ayında əvvəlki ilin uyğun dövrü ilə müqayisədə, 231 milyon manat daha çox vəsait xərcləyib. Sözügedən dövrdə fond xərcləri 2 milyard 501 milyon manat olub”.
1xeber.media xəbər verir ki, bunu deputat Vüqar Bayramlı deyib.
Onun sözlərinə görə, 2025-ci ildə qurumun xərclərinin artırılması öncədən proqnozlaşdırılıb:
“2024-cü ildə fondun təsdiq olunmuş xərcləri 6 milyard 949 milyon manat idisə, bu il üçün 7 milyard 676 milyon manat nəzərdə tutulub. Yəni bu il fondun xərcləmələrinin təxminən 10 faiz çox olacağı gözlənilir. Bu, həmçinin 2025-ci ildə yeni sosial paketin icrasına başlanılması ilə bağlıdır. İlin ilk 4 ayında fond tərəfindən 17 min 500-dən çox şəxsə pensiya təyin edilib. Bunlar yaşa, əlilliyə və ailə başçısını itirməyə görə pensiya təyinatlarıdır”.
Millət vəkili bildirib ki, növbəti aylarda sosial paketin daha da dərinləşməsi fondun xərclərinə təsir göstərəcək:
“Çünki fondun əsas fəaliyyət istiqamətləri pensiya, müaviət, təqaüd, ünvanlı sosial yardım və sığorta üzrədir. Bu istiqamətlərdə artımlar fond tərəfindən daha çox xərcləmələr deməkdir. Digər tərəfdən, qeyd olunan müddətdə fondun gəlirlərində də artım qeydə alınıb. Belə ki, fondun gəlirləri bu ilin yanvar-aprel aylarında proqnozla müqayisədə 13 faiz çox olmaqla, 2 milyard 715 milyon manat olub”.
