2025-ci ilin əvvəlinə olan məlumata görə, son bir ildə Azərbaycanda 44 min 700 baş iribuynuzlu, 965 min 800 baş xırdabuynuzlu heyvan azalıb. Bu isə ölkədə ət tələbatının daxili istehsalla tam ödənilməsinə mane olub. Nəticədə mart-aprel aylarında ət idxalının həcmi təxminən iki dəfə artıb. Bildirilir ki, bu tendensiya davamlı olarsa, qiymət artımı qaçılmaz olacaq.
Heyvan sayındakı kəskin azalmanın səbəbləri nələrdir? Ətin qiyməti bahalaşacaqmı?
1xeber.media xəbər verir ki.Globalingo.az-a danışan kənd təsərrüfatı üzrə ekspert Cəfər İbrahimli deyib ki, son 3-4 ildə ölkədə yem bazasının qiyməti kəskin bahalaşıb:
“Heyvandarlıq təsərrüfatları rentabelli olmadığı üçün əsasən, damazlıq heyvanlar kəsimə göndərilir. Belə davam edərsə, 2-3 il sonra heyvan sayı azalacaq, idxal artacaq. Ölkədə xırdabuynuzlu heyvanlar daha çox otlaq ərazilərdə, açıq yemləmə şəraitində saxlanılır. Örüş sahələrində otun yetərsiz olması, iqlim dəyişikliyi və idarəetmədəki problemlər səbəbindən qışda heyvanlar yarıqapalı və ya tam qapalı şəraitdə yemlənir. Bu da ətin istehsal xərclərini artırır və təsərrüfatlar gəlir gətirmədiyi üçün xırdabuynuzlu damazlıq heyvanlar da kəsilir. Hazırkı statistik göstəricilərin səbəbləri də bunlardır. Fikrimcə, həm iri, həm də xırdabuynuzlu heyvanların örüş, otlaq, yaylaq və qışlaq məsələlərinin həlli barədə köklü iş aparılmalıdır”.
Ekspert xatırladıb ki, dövlət 15 ilə yaxındır, damazlıq heyvanların idxalına subsidiyalar verir:
“Məqsəd heyvandarlıq təsərrüfatının inkişaf etdirilməsidir. Lakin nəticə arzuolunan səviyyədə deyil. Qiymətin bahalaşmasına gəldikdə isə, bunun olacağını düşünümürəm. Vətəndaşlar yerli ətə üstünlük verirlər. İdxal olunan ətin daha ucuz olması qiymətlərin sabit qalmasını təmin edir. Ümumilikdə, son 2-3 ildə qiymətlərin kifayət qədər artığını nəzərə alsaq, cari ildə sabit qalacağı gözlənilir”.
