Azərbaycan Prezidentinin köməkçisi – Prezident Administrasiyasının xarici siyasət məsələləri şöbəsinin müdiri Hikmət Hacıyevin İrana səfəri və bu ölkədə səsləndirdiyi fikirlər diqqət çəkib.
Prezidentin köməkçisi “Tehran Dialoq Forumu”nda çıxış edib, iranlı həmkarı Mehdi Sənai və Milli Təhlükəsizlik Şurasının katibi Dr. Əkbər Əhmədianla görüşüb. Hikmət Hacıyev həmçinin səfər çərçivəsində Cənubi Qafqazdakı vəziyyəti də nəzərə çatdırıb. O, artıq regionda de-fakto sülhün olduğunu, bunun üçün əlverişli şərtlərin formalaşdığını bildirib. Tehran səfəri Bakı ilə münasibətlər və mövcud geosiyasi şəraitdə xüsusi maraqla qarşılanıb.
1xeber.media xəbər verir ki.Globalinfo.az-a danışan politoloq Qabil Hüseynli deyib ki, Hikmət Hacıyevin İrana son səfəri ilə öncəkilər arasında bir neçə mühüm fərq var:
“Bu səfər ilk növbədə Azərbaycan-İran münasibətlərinin normallaşması və iki ölkə arasındakı gərginliyi azaltmaq məqsədini güdür. Lakin diqqət çəkən məqam, Hikmət Hacıyevin budəfəki səfərinin öncəkilərlə müqayisədə daha çox siyasi məzmun daşımasıdır. Azərbaycan artıq əvvəlki dövrlərdə olduğu kimi yalnız regional məsələlərə diqqət yetirmir. Bu, həm də İranın yer aldığı daha geniş geosiyasi kontekstdə Bakının mövqeyini möhkəmlətmək niyyətidir. Tehranın xüsusən də Qərblə münasibətlərindəki gərginliklər fonunda Azərbaycanın bu yanaşması həm regional, həm də qlobal səviyyədə diqqət çəkir”.
Politoloq bildirib ki, bu cür addımlar ölkəmizin geosiyasi mövqeyini gücləndirmək üçün çox vacibdir:
“Bu, eyni zamanda Azərbaycan diplomatiyasının nə qədər çevik və strateji olduğunun göstəricisidir. Tehranla münasibətlərin yaxşılaşdırılmasına yönəlik addımlar, Bakı üçün əhəmiyyətli geosiyasi nüansları da üzə çıxarır.
Hikmət Hacıyevin İrana səfəri ilə yanaşı İsrailin Baş naziri Benyamin Netenyahunun təxirə salınan Bakı səfəri diqqət çəkir. Beləliklə Bakı, həm Tehranla, həm də Təl-Əvivlə münasibətlərini paralel şəkildə inkişaf etdirə biləcəyini və bu yanaşmanın yalnız milli maraqlarına xidmət etdiyini göstərir.
Azərbaycanın hər iki tərəfə münasibətdə müstəqil və balanslı xarici siyasət həyata keçirir. Bu ölkəmizin geosiyasi mövqeyini daha da gücləndirə bilər”.
