“Azərbaycan Ermənistanla danışıqları davam etdirməlidir. Eyni zamanda Ermənistan atəşkəsi pozmaqda davam edərsə, cavab tədbirləri də görməliyik”.
1xeber.media xəbər verir ki.bunu Musavat.com-a açıqlamasında “Atlas” Araşdırmalar Mərkəzinin rəhbəri, politoloq Elxan Şahinoğlu bildirib.
Ekspertin fikrincə, baş nazir Nikol Paşinyan “Avropa Siyasi Birliyi”nin gələn ilin yazında İrəvandakı sammitinə qədər Prezident İlham Əliyevlə sülh sazişini imzalamağı arzulayır:
“Bununla Paşinyan iki məqsəd güdə bilər. Birincisi, sülh sazişi Avropa liderlərinin İrəvandakı toplantısına qədər imzalanarsa, Nikol Paşinyan parlament seçkisi öncəsi reytinqini gücləndirmiş olacaq. Bu, onun üçün həyati əhəmiyyətlidir”.
Politoloq digər bir məqama da diqqət çəkib:
“İkincisi, Azərbaycanla sülh sazişi zirvə toplantısına qədər imzalanarsa, Prezident İlham Əliyevin İrəvandakı toplantıda iştirakına heç nə mane olmayacaq. İlham Əliyevin İrəvandakı tədbirdə iştirakı Avropa İttifaqı üçün arzuolunandır. Bu səbəbdən Nikol Paşinyan da İlham Əliyevin İrəvandakı tədbirdə iştirakını istəyir.
İlham Əliyevin İrəvandakı tədbirdə iştirakı öz növbəsində Nikol Paşinyanın da “Avropa Siyasi Birliyi”nin Bakıdakı tədbirində iştirakına yolunu açacaq. Buna baxmayaraq, Paşinyanın istəyinin reallaşması, yəni Azərbaycanla sülh sazişinin “Avropa Siyasi Birliyi”nin İrəvandakı toplantısına qədər imzalanması üçün Ermənistan Konstitusiyası bu il ərzində dəyişdirilməlidir.
Paşinyan mayın 26-da “İrəvan dialoqu - 2025” ikinci beynəlxalq forumu zamanı buna eyham vurub: “Əgər Konstitusiya Məhkəməsi sülh sazişini təsdiq etməsə, Konstitusiya dəyişikliyi ilə bağlı təşəbbüslə özüm çıxış edəcəyəm. Sülh sazişini imzalamaq imkanını əldə verməməliyik”.
Nikol Paşinyanın cümləsinin birinci hissəsində konkret olaraq Konstitusiyanın sülh sazişinə qədər dəyişəcəyi söylənmir. Ancaq cümlənin ikinci hissəsində sülh sazişinin qısa müddətdə imzalamaq üçün əsas maneənin ortadan qaldırılmasına işarə var”.
Elxan Şahinoğlu qeyd edib ki, Paşinyan sülh sazişi imzalanan gün Minsk Qrupunun buraxılması məqsədilə Azərbaycanla birgə ATƏT-ə müraciət edəcəyini də söyləyib:
“Paşinyanın bu açıqlamalarının arxasında onun mayın 16-da “Avropa Siyasi Birliyi”nin Tiranadakı toplantısında İlham Əliyevlə müzakirəsinin də təsiri olub. İndi qalır bu deyilənləri reallaşdırmaq. Paşinyan sülh sazişini “Avropa Siyasi Birliyi”nin İrəvandakı toplantısına qədər imzalamaq istəyirsə, sürətini artırmalı, il ərzində Konstitusiyaya ya referendum yolu ilə, ya da parlamentdə əncam çəkməlidir”.
