Azərbaycanın quru sərhədləri pandemiya səbəbindən bağlanmış və hələ də tam açılmamışdır.
Rəsmi qurumlar sərhədlərin açılması ilə bağlı mütəmadi açıqlamalar versələr də, dəqiq tarix hələ müəyyən edilməyib. Bu qərar əsasən epidemioloji vəziyyətdən və təhlükəsizlik tədbirlərindən asılıdır. Sərhədlərin bağlı qalması ölkə iqtisadiyyatına necə təsir edir? Quru sərhədlərin açılması üçün hansı şərtlər tələb olunur?
1xeber.media xəbər verir ki məsələ ilə bağlı Tribunainfo.az-a açıqlama verən fəlsəfə doktoru Günay Hüseynova bildirib ki, iqtisadi və ya qeyri iqtisadi, müxtəlif səbəblərdən bir ölkənin quru sərhədlərinin uzun müddət bağlı olmasının mənfi tərəfləri olsa da əslində iqtisadi baxımdan müəyyən sahələrin inkişafı üçün faydalıdır.
Belə ki, yerli sahibkarlığın qorunması, yerli istehsalın qorunması və eyni zamanda vətəndaşların yerli istehsala yönləndirilməsi baxımından faydalıdır. Əslində bir neçə il bundan öncə, quru sərhədlərin açıq olduğu dönəmlərdə cənub bölgəsi əsasən ehtiyaclarını qarşılamaq, zəruri məhsulların idxalı üçün İrana, Naxçıvan bölgəsi Türkiyəyə, qərb bölgəsi Gürcüstana, şimal bölgəsi isə Rusiyaya üz tuturdu. Əslində biz düşünürdük ki, sərhədlərin bağlı olması bir növ yerli sahibkarlığa dəstək olacaq. Lakin son dönəmlərdə statistik məlumatlara əsasən idxal payımız olduqca yüksəkdir. Xüsusilə də zəruri ehtiyac mallarında, gündəlik tələbat məhsullarında bu görünür. Heyvandarlıq sahəsinin statistikası digər illərlə müqaisədə olduqca aşağı səviyyədədir. Eyni zamanda kartof məhsulunu da bura aid etməliyik. Daha öncəki dönəmlərdə Azərbaycan bu məhsulların, eyni zamanda digər kənd təsərrüfatı məhsullarının ixracatçısı kimi tanınırdı. Son zamanlarda isə bu sahələrdə enmə müşahidə olunub. Biz bunu yaxın ölkələrdən idxal edirik.
