Ölkənin Muğan zonasında cari təsərrüfat ilində taxıl əkininin həcmi azalıb.
"Report"un Muğan bürosu bu bölgədə taxıl əkininin azalmasının səbəblərini araşdırıb.
Rəsmi statistikaya əsasən, Muğanda taxıl əkinində ən çox azalma İmişli rayonunda müşahidə olunur. Ötən təsərrüfat ilində rayonda 9 min 136,5 hektar sahədə buğda, 7 min 384,5 hektar sahədə arpa əkilmişdisə, bu il 2 min 509,7 hektar sahədə buğda və 6 min 844 hektar sahədə arpa əkilib. Analoji hal Cəlilabad və Biləsuvar rayonlarında da qeydə alınıb.
Cəlilabad rayonunda ötən təsərrüfat ilində 56 min 580 hektar sahədə buğda, 9 min 650 hektar sahədə arpa əkildiyi halda, bu il 46 min 980 hektar sahədə buğda və 13 min 450 hektar sahədə arpa əkilib. Eyni zamanda, Biləsuvar rayonunda keçən təsərrüfat ilində 9 min 698,9 hektar sahədə buğda, 24 min 281,3 hektar sahədə arpa əkilsə də, bu il 7 min 563 hektar sahədə buğda və 24 min 086 hektar sahədə arpa əkilib.
Fermerlər azalmanın əsas səbəbini məhsulun qiyməti ilə əlaqələndirirlər. Onların sözlərinə görə, 2024-cü ilin təsərrüfat ilində məhsulun bir kiloqramının qiyməti ötən illə müqayisədə xeyli azalaraq 55-60 qəpikdən 35-40 qəpiyə düşüb. Buna görə də fermerlər bu il pambıq, noxud və bostan bitkilərinin əkininə daha çox üstünlük veriblər.
Mövzu ilə bağlı “Report”un Muğan bürosuna danışan ekoloji məsələlər və kənd təsərrüfatı üzrə mütəxəssis Mirsahib Zəkiyev qeyd edib ki, bölgədə taxıl əkini sahələrinin azalmasının əsas səbəbi növbəli əkinlə bağlıdır. Çünki taxılçılıqda növbəli əkininin torpağın strukturunun saxlanmasında və məhsuldarlığın artırılmasında böyük rolu var:
"Məlum olduğu kimi müxtəlif kənd təsərrüfatı bitkiləri eyni bir sahədə ardıcıllıqla becərildikdə, onların hər birinin torpaqdan zəruri minerallarla qidalanmaları təbii şəkildə azalır.
Əkinlərin növbələşdirilməsi isə xəstəliklərin inkişafının qarşısını alır, alaq otlarının azalmasına, torpaq strukturunun, yəni torpaq hissəciklərinin və məsamələrinin yaxşılaşmasına səbəb olur. Buna görə də fermerlər dənli bitkiilərin əkininə fasilə verərək pambıq, yonca, şəkər çuğunduru və digər bitkilərin əkininə üstünlük veriblər”.
