“The Atlantic” jurnalı ABŞ-ın iyunun 2-də İstanbulda Rusiya və Ukrayna arasında keçiriləcək danışıqların ikinci raundunda iştirak üçün nümayəndə heyəti göndərməyəcəyini yazıb.
Jurnalın məlumatına görə, ABŞ Prezidenti Donald Tramp danışıqların bu raundunda müəyyən irəliləyiş görmək istəyir. Lakin buna baxmayaraq nümayəndə heyəti göndərməyi planlaşdırmır. Maraqlıdır ki, Trampın Rusiya Prezidenti Vladimir Putinlə mayın 16-da baş tutan ilk danışıqlarda iştirak etməsi razılaşdırılsa da, iki lider də son anda qərar dəyişdirdilər. Amma yenə də müharibə başlayandan bu yana ilk dəfə Kiyev və Moskva arasında birbaşa danışıqlar aparıldı.
İstanbulda gözlənilən növbəti görüşün nəticəsi necə olacaq? ABŞ-ın müzakirələrə qatılmamasının səbəbi nədir?
Globalinfo.az-a danışan politoloq Qabil Hüseynli deyib ki, Vaşinqtonun danışıqların ikinci raunduna nümayəndə heyəti göndərməməsi, diplomatik protokol çərçivəsində neytral görünə bilər, lakin bu qərarın arxasında Ağ Evin bölgədəki strateji planına dair çoxşaxəli mesajlar dayanır:
“Əvvəla, Birləşmiş Ştatların danışıqlarda birbaşa iştirakdan imtinası, bu raunddan ciddi nəticə gözləmədiyini göstərir. ABŞ münaqişənin kəskin fazasında təşəbbüs sahibi kimi görünməyi üstün tutur, amma danışıqlar diplomatik formalizm səviyyəsində qalırsa və tərəflər arasında kompromis iradəsi görünmürsə, belə təşəbbüslərdə meydana çıxmamağı daha məqsədəuyğun sayır. Bu, həm də məsuliyyətdən uzaq durmaq, uğursuz danışıqların nəticəsini üzərindən atmaq cəhdidir. Digər tərəfdən, Vaşinqtonun İstanbul formatına isti baxmaması, Rusiya ilə dialoq platformasının hələ tam bərpa olunmadığını da nəzərə çatdırır”.
Politoloq bildirib ki, İstanbul danışıqlarında razılaşmanın əldə olunması ehtimalı olduqca azdır:
“Moskva indiki mərhələdə status-kvonu dəyişməkdə maraqlı deyil. Onun Ukraynanın neytrallığı və Krımın Rusiya ərazisi olaraq tanınması kimi əsas tələbləri var və bunların qəbuluna çalışır. Ukrayna tərəfi isə suverenlik və ərazi bütövlüyündən kənar heç bir formulu qəbul etmir.
Tramp administrasiyasının bütün bunlar fonunda geri planda qalması, həm də gələcək üçün manevr imkanlarını qorumağa hesablanıb. Əgər prosesdə irəliləyiş əldə olunarsa və kompromis konturları yaranarsa, ABŞ həmin mərhələdə “sülhün memarı” obrazı ilə ortaya çıxa bilər. Əks halda, məsuliyyəti Türkiyə və Avropa dövlətlərinin üzərinə atmaqla öz maraqlarını sığortalayır”.
