İmişli Ağsaqallar Şurasının keçmiş sədri Saleh Səmədovun ötən gün həbs edildiyi haqda məlumat vermişdik.
1xeber.media xəbər verir ki, məlumatda ən diqqətçəkici məqam onun həbsinin Dövlət Təhlükəsizliyi Xidməti tərəfindən həyata keçirilməsidir.
Həbsi niyə DTX həyata keçirməlidir?
Medianın yaydığı məlumata görə, S.Səmədov CM-in 179-cu maddəsi ilə ittiham olunur. CM-in 179-cu maddəsi “mənimsəmə və israf etmə”ni nəzərdə tutur və özündə 4 bəndi birləşdirir:
179.1. Mənimsəmə və ya israf etmə, yəni təqsirkara etibar edilmiş özgə əmlakını talama - min manatdan iki min manatadək miqdarda cərimə və ya üç yüz altmış saatdan dörd yüz səksən saatadək ictimai işlər və ya iki ilədək müddətə islah işləri və ya iki ilədək müddətə azadlığın məhdudlaşdırılması və ya iki ilədək müddətə azadlıqdan məhrum etmə ilə cəzalandırılır.
179.2. Eyni əməllər:
179.2.1. qabaqcadan əlbir olan bir qrup şəxs tərəfindən törədildikdə;
179.2.2. təkrar törədildikdə;
179.2.3. şəxs tərəfindən öz qulluq mövqeyindən istifadə etməklə törədildikdə;
179.2.4. xeyli miqdarda ziyan vurmaqla törədildikdə—
dörd min manatdan yeddi min manatadək miqdarda cərimə və ya əmlakı müsadirə olunmaqla və ya olunmamaqla bir ildən üç ilədək müddətə azadlığın məhdudlaşdırılması və ya iki ildən beş ilədək müddətə azadlıqdan məhrum etmə ilə cəzalandırılır.
179.3. Bu Məcəllənin 179.1 və ya 179.2-ci maddələrində nəzərdə tutulmuş əməllər:
179.3.1. mütəşəkkil dəstə tərəfindən törədildikdə;
179.3.2. külli miqdarda törədildikdə;
179.3.3. əvvəllər talama və ya hədə-qorxu ilə tələb etməyə görə iki dəfə və ya daha çox məhkum edilmiş şəxs tərəfindən törədildikdə -
əmlakı müsadirə olunmaqla və ya olunmamaqla beş ildən on ilədək müddətə azadlıqdan məhrum etmə ilə cəzalandırılır.
179.4. Bu Məcəllənin 179.1—179.3-cü maddələrində nəzərdə tutulmuş əməllər xüsusilə külli miqdarda ziyan vurmaqla törədildikdə —
on ildən on dörd ilədək müddətə azadlıqdan məhrum etmə ilə cəzalandırılır.
Göründüyü kimi, CM-in 179-cu maddəsinin əhatə dairəsi həddən artıq genişdir, burada hətta “min manatlıq cərimədən” də söhbət gedir.
Ancaq Saleh Səmədovun məhz DTX tərəfindən həbs olunması göstərir ki, burada CM-in 179-cu maddəsinin ağırlaşdırıcı bəndlərindən söhbət gedir. Üstəlik, məhkəmənin istintaq müddətində 4 aylıq həbs qətimkan tədbiri seçməsi də sıradan cəza deyil. Demək, istintaq orqanı 4 aylıq həbs tələb edib. Bu isə cinayət işi ilə bağlı ciddi araşdırmaların aparılacağına dəlalət edir.
CM-in 179-cu maddəsində ağırlaşdırıcı bəndlər “bir qrup şəxsi” əhatə edir. Beləliklə, Saleh Səmədovla bərabər daha kimlərinsə istintaqa cəlb edilməsi ehtimalı yüksəkdir.
Buna baxmayaraq, əməliyyatı Dövlət Təhlükəsizliyi Xidmətinin – hüquq-mühafizə orqanlarının elitasının həyata keçirməsini şərtləndirən daha bir ehtimal da var.
Bir müddət öncə, hələ İmişli Ağsaqqallar Şurasının sədri olarkən Saleh Səmədov içkili halda avtomobil sürərkən saxlanılmış, ondan sənəd tələb edən polis əməkdaşını isə ağır sözlərlə təhqir etmişdi. İmişli RPŞ-nin rəisi Azər Tağıyev isə yol polisi əməkdaşının kamerası vasitəsilə qeydə alınan bu görüntülərdəki təhqirləri izlədikdən sonra prinsipial mövqe tutmuş və onun 1 ay müddətində inzibati qaydada həbsinə nail olmuşdu.
Həmin vaxt Saleh Səmədovun yaxın dostlarının dövriyyəyə girdiyi iddia edilir. S.Səmədovun xahişini edən isə onunla yaxın dostluq münasibəti olan millət vəkili Siyavuş Novruzov olduğu söylənilir. S.Novruzovun israrlarına baxmayaraq, Saleh Səmədovu həbsdən azad etmək mümkün olmayıb. Buna baxmayaraq, Apellyasiya Məhkəməsində onun cəzasını 15 sutkaya endirməyə və daha tez azad olunmasına nail olublar.
Redaksiyamıza daxil olan məlumatda bildirilir ki, bundan sonra Ombudsman Aparatı 3 ay ərzində bir neçə dəfə “qəfil yoxlamalarla” İmişli Polis Şöbəsində reyd keçirib və ciddi narahatlıq yaradıb. Xatırladaq ki, ombudsman Səbinə Əliyeva Siyavuş Novruzovun həyat yoldaşıdır.
Ehtimal olunur ki, hazırkı əməliyyatı DTX-nin keçirməsinin səbəbi Saleh Səmədovun himayədarlarının çox, imkanlarının isə geniş olması ilə bağlıdır.
Bu məqamda Saleh Səmədovun var-dövlətinin bir hissəsini növbəti dəfə yada salaq:
1. İmişlidə "Kral Saray" adlı şadlıq sarayı;
2. "Kral" çay evləri şəbəkəsi;
3. Uşaq bağçası;
4. Çörək sexi;
5. Spirt-şirə zavodu;
6. Hipermarket;
7. Kolbasa sexi;
8. Mal-qara və donuz fermaları;
9. 20 hektar ərazini əhatə edən istilikxanası və s.
Onun "Rolls-Royce"a, həmçinin paytaxtda villalara, market, restoranlara, tikinti şirkətinə sahib olduğu deyilir.
Bu baxımdan DTX-nin istintaq aparmasının səbəbləri sırasında Saleh Səmədovun himayədarlarının və dostlarının imkanlarından istintaqa təsir üçün istifadə ehtimalını aradan qaldırmaq, eyni zamanda, mənimsəmənin onun ölkənin bir neçə ərazisində fəaliyyət göstərən şəbəkəsində aşkarlanması ehtimalıdır.
Bakupost
