Bakının tarixi siması, tarixi məhəllələri Bakının yeni baş planına (Bakı2040) zidd olaraq sökülmə təhlükəsi altındadır.
Bu barədə memar Dilqəm İsmayılov paylaşım edib. O bildirib ki, bir ildən çoxdur bu problemlə bağlı aidiyyəti orqanlara yaxdığı məktublara baxılmır:
“Əziz yoldaşlar, Bakı sakinləri, Bakını sevən hər kəs, bu ölkəni sevən, bu şəhərin, bu ölkənin tarixini sevən hər kəs, siyasi, dini, ideoloji düşüncələrindən asılı olmayaraq, müxalifyönümlü, iqtidaryönümlü düşüncələrdən asılı olmayaraq, yaşından, statusundan asılı olmayaraq, bu şəhər üçün, bu şəhərin tarixi, memarlıq siması, ruhunu qorumaq istəyən hər kəsə səslənirəm, Bakının tarixi siması, tarixi məhəllələri Bakının yeni baş planına (Bakı2040) zidd olaraq sökülmə təhlükəsi altındadır!
Biz artıq bir ildir ki, bütün aidiyyəti qurumlara məktublarla müraciətimizi bildirdik. Amma heç bir qaneedici cavab almadıq. Ona görə də, son olaraq, Bakının sizlərə, sizin səslərinizə ehtiyacı var. Məni tanıyan hər kəs bilir ki, hər hansı öz şəxsi problemimə görə, heç vaxt heç kəsdən hər hansı bir şey xahiş etmərəm, amma hazırda tək istəyim, fəryad edən, yaralanan Bakının xilası üçün bir cəhddir.
Hamınızdan xahiş edirəm ki, Bakımızın xilası üçün, hamımız kütləvi olaraq, bu petisiyanı imzalayaq, səsimiz çatmayanlara da səsimizi çatdıraq. Ümid edirəm ki, petisiyamız kütləvi xarakter alacaq və Bakımızı birlikdə xilas edə biləcəyik”.
tribunainfo.az
