"Türkiyə şirkətinin Xəzərin Azərbaycan sektorunda neft-qaz layihələrində iştirakı tərəflər arasında mövcud siyasi-iqtisadi əməkdaşlığın daha üst səviyyəyə çıxarılmasına xidmət edəcək".
Bunu Qaynarinfo-ya açıqlamasında REAL-ın sədri Natiq Cəfərli Türkiyə Neft Şirkətinin (TPAO) Xəzərin Azərbaycan sektorundakı Şəfəq-Asiman təbii qaz yatağında 30% paya sahib olmasının siyasi və iqtisadi üstünlüklərini şərh edərkən deyib.
Natiq Cəfərli bildirib ki, Azərbaycanla Türkiyə arasında istənilən sahədə əməkdaşlığın keçən hər il, hər ay getdikcə artdığını müşahidə etməkdəyik:
"Bu da normal haldır. Bakı ilə Ankara gələcəyə yönəlik bütün sahələr üzrə təbii müttəfiqdirlər. Nadir ölkələr belə təbii müttəfiqliyə malikdir. Burada söhbət hərbi və digər sahələr üzrə əməkdaşlığın iqtisadi sahələr üzrə daha da genişləndirilməsindən gedir. Çünki onlar arasında qarşılıqlı investisiya qoyuluşunun artırılması, qarşılıqlı ticarət dövriyyəsinin illik 15 milyard dollara çatdırılması ilə bağlı hədəflər var. Bu da investisiya və qarşılıqlı ticarətdə özünü büruzə verir, onlar artacaq.
Türkiyə şirkətinin Azərbaycanın Xəzər sektorunda neft-qaz layihələrində iştirak etməsi də bu əməkdaşlığın daha üst səviyyəyə çıxarılmasına xidmət edəcək. Azərbaycanın da Türkiyədə böyük investisiyası var. SOCAR-ın İzmir və digər şəhəərlərdə qoyduğu investisiyaların həcmi 20 milyard dolları keçib. Türkiyə də Azərbaycanın enerji sektorunda pay almaqla həm investor, həm də qazanc sahibi olacaq".
Qeyd edək ki, Türkiyənin enerji və təbii sərvətlər naziri Alparslan Bayraktar Türkiyə Neft Şirkətinin (TPAO) Xəzər dənizinin Azərbaycan sektorunda yerləşən Şəfəq-Asiman təbii qaz yatağında 30% payla tərəfdaş olacağını bəyan edib. Bayraktar Türkiyə və Azərbaycanın enerji layihələrinin Avropanın enerji təhlükəsizliyinə töhfə verdiyini vurğulayaraq, Avropaya əlavə və alternativ mənbələrdən qaz tədarükü üçün yeni layihələrin həyata keçiriləcəyinə ümid etdiyini bildirib.
Göründüyü kimi, Türkiyə regionda təkcə siyasi deyil, iqtisadi müstəvidə də möhkəmlənməyi hədəfləyib ki, bunun da bölgə üçün böyük əhəmiyyəti vardır.
