Xantı-Mansiysk Muxtar Dairəsi Dumasının spikeri Boris Xoxryakov azərbaycanlı deputat Xalid Tağızadənin “təcili şəkildə geri qaytarılması” barədə göstəriş verib.
1xeber.media xəbər verir ki, Xoxryakov bu barərə özünün teleqram kanalında məlumat verib.
Xatırladaq ki, deputat Xalid Tağızadə Sibir xanlığı ilə bağlı tarixi fakta istinad edərək Yuqranın özbək xalqının tarixi vətəni olduğunu bildirdiyi üçün federal səviyyəli hücumlara məruz qalmışdı.
3 iyun tarixində Xantı-Mansiysk Muxtar Dairəsi Dumasında onun məsələsi müzakirə olunub və Tağızadə Sosial İnkişaf üzrə Daimi Komissiyanın sədri vəzifəsindən azad edilib. Lakin hələlik onun deputat mandatından məhrum edilməsinə dair hər hansı qanuni əsas müəyyən olunmayıb.
Rusiya mənbələrinin məlumatına görə, Xalid Tağızadə müzakirələr başlamazdan bir neçə saat öncə Xantı-Mansiysk bölgəsini tərk edib və 3 iyun gecəsi Bakıya uçub. Bu barədə Rusiya mənbələri məlumat yayıb.
Dumanın spikeri Boris Xoxryakov Telegram kanalında bildirib ki, deputat Tağızadə iclasda iştirak etməməsini “tətil müddətində bölgə xaricində olması” ilə izah edib. Spiker qeyd edib ki, Tağızadə ilə iclasdan əvvəl əlaqə saxlayıb və o, növbəti məzuniyyətdə olduğunu bildirib. Spiker tərəfindən 3 iyuna qədər deputatın məzuniyyətdən geri dönməsi barədə sərəncam imzalanıb.
Lakin həmin tarix artıq keçib və deputat hələ də geri qayıtmayıb.
“Daimi Komissiya, Sosial İnkişaf Komitəsi və bu gün keçirilən 46-cı Yuxarı Duma iclasında onun şəxsən iştirak etməsi üçün bütün zəruri tədbirlər görülüb. Amma deputat Tağızadə bu iclaslarda iştirak etmək qərarına gəlmədi”, – deyə spiker Xoxryakov bildirib.
O, ictimaiyyətə müraciət edərək vəziyyətin gərginləşdirilməməsi üçün “emosiyaların azaldılması” xahişini səsləndirib. Spikerin sözlərinə görə, deputatların məsələnin “ört-basdır” edilməsinə marağı yoxdur.
“Qəbul edilən bütün qərarlar qanunvericiliyin imkan verdiyi maksimal çərçivədə olub. Hamımız belə bəyanatların və hərəkətlərin, Rusiya və Yuqradakı ərazi bütövlüyünə və millətlərarası sabitliyə təhdid yarada biləcək halların yolverilməzliyini dəstəkləyirik”, – deyə Boris Xoxryakov vurğulayıb. (Bizim.Media)
