Çində aparılan arxeoloji araşdırma nəticəsində alimlər, 4500 il əvvəl Şandun vilayətində yaşamış qədim bir toplumun sosial strukturuna dair diqqətçəkən nəticələr əldə ediblər.
1xeber.media xəbər verir ki, beynəlxalq arxeoloq qrupunun Çinli mütəxəssislər rəhbərliyi ilə apardığı tədqiqatın nəticələri "Nature" elmi jurnalında dərc olunub.
Tədqiqat çərçivəsində eramızdan əvvəl 2750-2500-cü illər arasında yaşamış 60 nəfərə aid DNT nümunələri təhlil edilib. Nəticələr göstərib ki, həmin cəmiyyət nəsil bağlarını yalnız ana xətti üzrə izləyirmiş, yəni matrilineal sosial sistemə malik olub.
Bu sistem ən azı 10 nəsil, yəni təxminən 250 il boyunca sabitliyini qoruyub ki, bu da qədim matrilineal toplumlar üçün misilsiz bir haldır.
Araşdırma göstərir ki, bu toplum əsasən darı becərilməsi, heyvandarlıq və böyük ehtimalla balıqçılıqla məşğul olub. Maraqlısı budur ki, bu qədər uzunömürlü bir matrilineal struktur, böyük sosial və maddi təbəqələşmə olmadan da cəmiyyətin sabit və funksional şəkildə mövcud ola biləcəyini sübut edir.
Bu nəticələr antropologiyanın ən mübahisəli suallarından birinə - qədim insan cəmiyyətlərində üstünlük təşkil edən qohumluq tipinə dair yeni baxış bucağı təqdim edir.
Alimlərin fikrincə, bu, qədim dövrlərdə matrilineal sistemlərin yalnız müvəqqəti deyil, həm də davamlı və uğurlu şəkildə mövcud ola bildiyini təsdiqləyən ilk sənədli sübutdur. Bu isə neolit dövrü cəmiyyətlərinin sosial təşkili haqqında mövcud elmi təsəvvürləri yenidən nəzərdən keçirməyə zəmin yaradır.
