İran və İsrail arasında hərbi qarşıdurma geniş miqyas alıb. Son məlumatlara görə, İsrailin İrana qarşı endirdiyi raket zərbələri nəticəsində azı 78 nəfər həyatını itirib, 320-dən çox şəxs yaralanıb. Hücumlar zamanı İranın yüksək rütbəli hərbçiləri və nüvə sahəsində çalışan mütəxəssisləri də hədəf alınıb.
İranın cavab hücumları nəticəsində İsraildə onlarla yaralı var, bir neçə nəfərin həyatını itirdiyi bildirilir.
Rəsmi Bakı baş verənlərlə bağlı mövqeyini açıqlayıb. Azərbaycanın Xarici İşlər Nazirliyi bildirib ki, vəziyyətin gərginləşdirilməsini qəti şəkildə pisləyir və tərəfləri mövcud fikir ayrılıqlarını yalnız beynəlxalq hüququn norma və prinsiplərinə uyğun olaraq, dialoq və diplomatik yollarla həll etməyə çağırır.
Açıqlamada mülki əhalinin və obyektlərin təhlükəsizliyinin təmin olunmasının vacibliyi xüsusi olaraq vurğulanıb.
Qeyd edək ki, hər iki ölkədə yüzlərlə Azərbaycan vətəndaşı var. Onların Azərbaycana təxliyə edilib-edilməyəcəyi müzakirə olunan mövzular arasındadır.
Modern.az məsələ ilə əlaqədar Xarici İşlər Nazirliyi (XİN) ilə əlaqə saxlayıb.
Qurumun mətbuat xidmətindən sorğumuza cavab olaraq bildirilib ki, İsrail və İran ərazisində olan Azərbaycan vətəndaşlarından təxliyə üçün indiyədək heç bir müraciət daxil olmayıb.
XİN ötən günü hər iki ölkədə olan vətəndaşlarımıza xəbərdarlıq edib. Bildirilib ki, İsrail və İrana zəruri olmadığı müddətcə səfərdən çəkinmək lazımdır.
Hazırda İsrail və İranda olan Azərbaycan Respublikası vətəndaşlarından mühafizə və təhlükəsizlik qaydalarına riayət etmələri, yerli qurumların verdiyi təhlükəsizlik təlimatlarına uyğun davranmaları xahiş olunur.
Hər hansı bir fövqəladə vəziyyət ilə bağlı vətəndaşlarımız aşağıdakı nömrələrlə əlaqə saxlamalıdırıar:
Azərbaycan Respublikasının İran İslam Respublikasındakı Səfirliyi
[email protected]
+98 905 523 01 07
Azərbaycan Respublikasının Təbriz şəhərindəki Baş Konsulluğu
[email protected]
+961 4 922 066
Azərbaycan Respublikasının İsrail Dövlətindəki Səfirliyi
[email protected]
+972 54 539 77 88
