Xəbər verdiyimiz kimi, aylardır ki, apteklərdə “Varfarin” adlı dərman preparatı ilə bağlı ciddi qıtlıq müşahidə olunur. Qiyməti o qədər də baha olmayan bu dərmanın bazarda alternativi yoxdur. Buna baxmayaraq rəsmi qurum tərəfindən hələ də hərəkətlənmə yoxdur.Bir sözlə ürək xəstəliyi olan minlərlə insan üçün həyati əhəmiyyət daşıyan bu dərmanın ölkəyə idxalı müşkülə çevrilib.
Nə sirrdirsə, Səhiyyə Nazirliyinin Analitik Ekspertiza Mərkəzi “Varfarin”i ölkəyə idxalın imkan yaratmır. Bəsit səbəb üzündən zavod da çıxılmaz durumda qalıb.Məlumat üçün bildirək ki, “Varfarin” – ürəyində klapan əməliyyatı keçirmiş və ya qan laxtalanmasının qarşısını almaq məqsədilə gündəlik istifadəsi lazım olan dərmandır. Bu preparatdan müntəzəm istifadə edilmədikdə tromblaşma, infarkt, insult və digər ağır fəsadlar yarana bilər. Hazırda minlərlə pasiyentin həyatı bu dərmanın mövcudluğundan asılıdır.
Real vəziyyəti öyrənmək üçün paytaxtda fəaliyyət göstərən bir neçə aptekə təkrar üz tutduq.
Əhməd Cavad, Kazım Kazımzadə küçəsi və Azadlıq prospekti ətrafında yerləşən bir neçə aptekdə olduq. Apteklərdən bildirildi ki, artıq bir neçə aydır depolarda “Varfarin” dərmanı mövcud deyil. Hətta son zamanlar bu dərmana olan tələb daha da artıb.Redaksiyamıza sözügedən dərmanla bağlı çoxsaylı şikayətləri nəzərə alaraq növbəti dəfə Analitik Ekspertiza Mərkəzinə müraciət etdik. Mərkəzdən Bizim.Media-ya dəmanın ölkəmizə idxalı ilə bağlı hələki heç bir yenilik olmadığı bildirilib:
“Bu məsələ ilə bağlı heç bir dəyişiklik yoxdur. Qeyd etməliyik ki, Səhiyyə Nazirliyi və onun tabeliyindəki qurumlar dərman idxalı ilə məşğul olmurlar. Ölkəyə dərman vasitələrini (DV) yalnız özəl şirkətlər idxal edir. Hazırda qeyd edilən DV (“Varfarin Stada”, 2,5 mq, N250) üzrə əvvəlki qeydiyyat vəsiqəsinin müddəti 01.10.2024-cü il tarixində bitib. Davam edən yenidən qeydiyyat prosesi çərçivəsində 03.03.2025-ci il tarixli 27561/24 nömrəli ekspertiza rəyi əsasında dərmanın yararlılıq müddəti 3 il olaraq qiymətləndirilib. Bu səbəbdən, əvvəlki qeydiyyat vəsiqəsinə uyğun olaraq istehsal olunmuş və 5 illik yararlılıq müddətinə malik partiyaların idxalı məqsədəuyğun hesab edilmir".
Qurum əvvəlki açıqlamasını növbəti dəfə təkrarlayıb:
“Artıq bu dərman vasitəsi 07.04.2025-ci il tarixində 25-00442 nömrəli yeni qeydiyyat vəsiqəsi alıb. Yeni qeydiyyata əsasən, “Varfarin”in yararlılıq müddəti 3 il olaraq təsdiqlənib. Beləliklə, bu dərmanın istənilən qədər idxalı artıq mümkündür”.
Həll gecikir, risk böyüyür...
Hazırda minlərlə insanın həyatı bu dərmanın mövcudluğundan asılı olsa da, hələ də apteklərə bu dərman gəlmir. Bu isə vəziyyəti daha da acınacaqlı hala salır. Rəsmi qurumun yararlılıq müddətinə hədəflənməsi və inad olaraq minlərlə xəstəni dərmansız qoyması müəmmalı olaraq qalır.
Görünən odur ki, problemin operativ şəkildə həll olunmasının zəruriliyinin Səhiyyə Nazirliyi üçün heç bir əhəmiyyəti yoxdur.
