Bakı Ağır Cinayətlər Məhkəməsində hakim Novruz Kərimovun sədrliyi ilə Müdafiə Nazirliyinin sabiq işçisi, “Şlyapa Zahid” kimi tanınan Zahid Niftəliyevin cinayət işi üzrə məhkəmə prosesi davam edir.
1xeber.media xəbər verir ki, Dövlət Təhlükəsizliyi Xidmətində (DTX) başlanılmış cinayət işi üzrə istintaqa cəlb olunmuş Zahid Niftəliyev 42 milyon manatlıq mənimsəmədə ittiham olunur.
Prosesdə Zahid Niftəliyevin vəkili Əli Adıgözəlov vəsatətlə çıxış edib. Vəkil əvvəlcə Zahid Niftəliyevin mobil telefon məlumatlarının əldə olunması barədə mobil operatorlardan birinə sorğu göndərilməsini istəyib. Vəkil qeyd edib ki, Zahid Niftəliyev kredit əldə etmək üçün müraciət etməyib, “AtaBank”da olmayıb:
“Biz onun mobil telefonunun anten məlumatlarının, telefon danışıqlarının əldə olunmasını istəyirik. Səbəb isə odur ki, müəyyən edək o, banka gedib, ya yox.”
Vəsatətə münasibət bildirən hakimlər heyəti qərarı elan edib. Qərara görə, vəsatət təmin edilməyib.
Daha sonra vəkil Azərbaycan Ordusunun sabiq Baş Qərargah rəisi Nəcməddin Sadıkovun, ləğv edilmiş “AtaBank”ın İdarə Heyətinin keçmiş sədri Dəyanət Quliyevin və həmin bankın kassiri Barat Hüseynovun məhkəməyə çağırılması barədə vəsatət verib. Bu vəsatətlər də təmin edilməyib.
Bundan sonra vəkil bildirib ki, Zahid Niftəliyev Birinci Qarabağ müharibəsində iştirak edib və ona II dərəcəli əlillik təyin edilib. O, məhkəmədən qərar qəbul edilərkən bu məsələlərin nəzərə alınmasını xahiş edib. Məhkəmə bu vəsatəti təmin edib.
Daha sonra Mahir Rəfiyevin ibtidai istintaq zamanı verdiyi ifadə elan olunub. O bildirib ki, “AtaBank”ın səhmdarlarından biri olub. Onun ifadəsinə görə, keçmiş vergilər naziri Fazil Məmmədovun göstərişi ilə “AtaBank”dan Nəcməddin Sadıkovun göndərdiyi şəxsə kreditin təyin olunmasını təmin edib. O, ifadəsində qeyd edib ki, Nəcməddin Sadıkovun göndərdiyi, “Şahin-CO” MMC-nin təsisçisi olduğunu bildiyi Zahid Niftəliyevə krediti rəsmiləşdirib.
Daha sonra Mahir Rəfiyevin ifadəsinə münasibət bildirən Zahid Niftəliyev deyib ki, o, iki dəfə şirkətin ləğv olunması ilə bağlı olduğu deyilən sənədləri imzalayıb:
“İndi mən başa düşdüm ki, onlar mənə oyun oynayıblar. Mən Fazil Məmmədov işdən çıxandan sonra bildim ki, adıma kredit var.”
Qeyd edək ki, Zahid Niftəliyev iki il əvvəl rüşvət alma ittihamı ilə həbs edilib, Tərtər Hərbi Məhkəməsi onun əməlini tövsif edərək şərti cəza verib. Azadlığa buraxıldıqdan sonra o, Dövlət Təhlükəsizliyi Xidmətinin (DTX) İstintaq Baş İdarəsi tərəfindən yenidən həbs olunub.
İstintaq dövründə Gəncə Apellyasiya Məhkəməsi dövlət ittihamçısının Tərtər Hərbi Məhkəməsinin hökmündən verdiyi protesti təmin edib. Qərara əsasən, Zahid Niftəliyev vəzifə saxtakarlığında və külli miqdarda rüşvət almaqda təqsirli bilinərək 8 il 6 ay azadlıqdan məhrum edilib.
Hazırda DTX-də istintaqı yekunlaşdırılmış iş üzrə hərbçilər arasında “Şlyapa Zahid” ləqəbi ilə tanınan Zahid Niftəliyev öz adına formal şirkət açaraq “AtaBank” ASC-dən götürülmüş 42 milyon manat krediti ödəməməkdə təqsirləndirilir.
İttihama əsasən, Zahid Niftəliyev məqsədyönlü şəkildə həmin məbləğdə kredit almaq üçün “Şahin-CO” adlı şirkət yaradıb, şirkətin təsərrüfat və maliyyə vəziyyəti barədə “AtaBank” ASC-yə müvafiq məlumatlar təqdim etməklə 2016-cı ildə 12 ay müddətinə 42 milyon 470 min 885 manat kredit alaraq, təyinatı üzrə istifadə etməməklə xüsusilə külli miqdarda ziyan vurub.
O, götürülmüş kreditin, ləğv prosesində olan “AtaBank” ASC-yə ödənilməsi ilə bağlı məhkəmə qətnamələrini qərəzli olaraq icra etməyib.
Xüsusilə külli miqdarda mənimsəmə cinayətində iştirakı araşdırılan digər şəxslərlə bağlı DTX-də ayrıca cinayət işi ayrılıb.
Proses iyunun 25-də davam edəcək.
Musavat.com
