Rusiya prezidentinin mətbuat katibi Dmitri Peskov Ermənistanın baş naziri Nikol Paşinyanın Avrasiya İqtisadi İttifaqının (Aİİ) Minskdə keçiriləcək sammitinə qatılmamasından təəssüfləndiyini bildirib.
1xeber.media xəbər verir ki, Peskov jurnalistlərə açıqlamasında deyib:
"Təəssüf ki, əlbəttə. Amma Ermənistan videokonfrans vasitəsilə iştirak edəcək. Ermənistan Aİİ-nin üzvüdür, mühüm üzvdür".
Onun sözlərinə görə, Ermənistan Aİİ üzvlüyündən öz milli iqtisadiyyatı üçün böyük dividendlər alır.
“Aİİ-yə üzvlük Ermənistan iqtisadiyyatının hər il artımına inamla bir neçə faiz əlavə edir”, - Peskov qeyd edib.
İrəvanla Minsk arasında münasibətlərdə gərginlik Belarus prezidentinin Qarabağ müharibəsinin nəticələrinə dair səsləndirdiyi qiymətləndirmələrdən sonra yaranıb. Paşinyan daha sonra bəyan edib ki, Belarus lideri faktiki olaraq Azərbaycana yardım etdiyini etiraf edib və Aleksandr Lukaşenko orada prezident olaraq qaldığı müddətdə məmurlara Belarusa səfər etməyi qadağan edib.
