Avropa İttifaqının (Aİ) Şurası maliyyə nazirləri səviyyəsində Bolqarıstanın 2026-cı il yanvarın 1-dən avrozonaya daxil olmasını təsdiqləyib.
1xeber.media xəbər verir ki, bu barədə təşkilatın bəyanatında deyilir.
“Nazirlər Avropa Komissiyası və Avropa Mərkəzi Bankı tərəfindən Bolqarıstanın müvafiq konvergensiya hesabatlarında konvergensiya meyarlarına uyğunluğu ilə bağlı verilən müsbət qiymətləndirmələrlə razılaşıblar”, - məlumatda deyilir. Bolqarıstanın avroya keçidi ilə bağlı yekun qərar Aİ-nin iyunun 26-da keçiriləcək sammitində kompromis qərarla veriləcək.
Mayın sonunda Bolqarıstanda avroya keçidlə bağlı kütləvi etiraz aksiyaları keçirilib. Etirazçıları təkcə Bolqarıstan valyutasının vahid Avropa valyutası ilə əvəz etməsi deyil, həm də bu məsələ ilə bağlı referendumun keçirilməməsi qəzəbləndirib. Ölkənin müxtəlif şəhərlərinin sakinləri avroya keçidin iqtisadiyyata mənfi təsir göstərəcəyindən narahat olduqlarını bildiriblər.
Bundan əvvəl Bolqarıstan prezidenti Rumen Radev ölkənin avro zonasına daxil olması ilə bağlı referendum keçirilməsini təklif edib.
