Böyük Britaniyanın sağ yönümlü "Reform UK" partiyası ölkədə vergi sisteminin dəyişdirilməsini təklif edir. Məqsəd - varlı şəxsləri ölkəni tərk etməyə vadar edən səbəbləri aradan qaldırmaq və onları geri qayıtmağa təşviq etməkdir. Partiyanın fikrincə, bu, az gəlirli britaniyalıların vəziyyətinin yaxşılaşdırılmasına kömək edə bilər.
1xeber.media xəbər verir ki, tanınmış siyasətçi Naysel Faracın rəhbərlik etdiyi partiyanın təşəbbüsü "Britannia Card" adlandırılır. Lakin media və ictimaiyyət artıq bu təşəbbüsə "Robin Qud vergisi" deyə müraciət edir. Bu barədə "The Guardian" məlumat yayıb.
"Reform UK" layihəsinə əsasən, Birləşmiş Krallıqda rezident statusuna malik olmayan və ya ölkəyə yenidən qayıdan varlı ekspatların büdcəyə bir dəfəlik 250 min funt-sterlinq ödəməsi kifayət edəcək. Bunun müqabilində həmin şəxslər on il müddətində xarici gəlirlərinə və daşınmaz əmlaklarına görə Britaniya vergisindən azad olunacaq, həmçinin birdəfəlik şəkildə miras vergisindən tamamilə azad ediləcəklər.
Partiyanın planına görə, bu yolla toplanan vəsait tam şəkildə aztəminatlı britaniyalıların dəstəyinə yönəldiləcək. Hesablamalara əsasən, əgər ən azı 6 min nəfər "Britannia Card" proqramından yararlansa, dövlət büdcəsinə 1,5 milyard funt-sterlinq daxil olacaq və bu məbləğ 2,5 milyon aztəminatlı britaniyalıya yardım etmək imkanı yaradacaq.
Naysel Faracın sözlərinə görə, belə bir təşəbbüs varlı şəxslərin ölkəni tərk etməsinin qarşısını alacaq. Aztəminatlı vətəndaşlar isə bu proqram vasitəsilə ildə əlavə olaraq 600–1000 funt-sterlinq məbləğində dəstək ala biləcəklər. Dövlət bu vəsaiti ildə bir dəfə az gəlirli britaniyalıların bank hesablarına köçürəcək.
Lakin bəzi mütəxəssislər layihənin ölkə üçün ziyanlı ola biləcəyini düşünür. "The Independent"in sitat gətirdiyi "Tax Policy Associates" təşkilatının nümayəndəsi Dən Neydlın hesablamalarına görə, "Robin Qud vergisi" ölkənin illik gəlirində 34 milyard funt-sterlinqliq azalmaya səbəb ola bilər.
