İran rejiminin Azərbaycana qarşı yeni təhlükəli planlar hazırladığı iddia olunur.
1xeber.media xəbər verir ki, İran rejiminə müxalif mövqedən yayımlanan Araz News Telegram kanalı sensasion məlumat paylaşıb. Məlumata görə, İran İslam Respublikası İsraillə mümkün növbəti qarşıdurma zamanı Azərbaycanı da münaqişəyə cəlb etmək üçün raket hücumu həyata keçirməyi planlaşdırıb.
İddiaya əsasən, plan rejim tərəfindən əvvəlcədən hazırlanıb və Azərbaycanın güney bölgəsindən quzeyinə doğru raket zərbələri endirilməsini nəzərdə tutur. Bununla da dünya ictimaiyyətində belə bir təəssürat yaradılması hədəflənir ki, guya “Azərbaycanın güneyindəki əhali” İsrailin hücumlarına cavab olaraq Azərbaycanın quzeyini hədəf alır.
Bildirilir ki, bu ssenari SEPAH tərəfindən xüsusi olaraq hazırlanıb və reallaşdırılması üçün hərbi hazırlıq görülüb. Ancaq İsrail hərbi hava qüvvələrinin Təbrizdə yerləşən ikinci hərbi bazaya endirdiyi zərbələr nəticəsində bir sıra SEPAH komandirlərinin məhv edilməsi planın icrasını müvəqqəti təxirə salıb. Hazırda isə bölgədə gərginliyin artması fonunda həmin təhlükəli planın yenidən gündəmə gətirildiyi iddia olunur.
Bu məlumatlarda həmçinin vurğulanır ki, İran rejimi belə bir təxribatla həm bölgədə yeni gərginlik yaratmaq, həm də öz daxili uğursuzluqlarını ört-basdır etmək niyyətindədir.
Xatırladaq ki, Azərbaycan Respublikası rəsmi olaraq dəfələrlə bəyan edib ki, Azərbaycanın güneyində yaşayan soydaşlarının təhlükəsizliyi onun üçün qırmızı xətdir. Bakı İran rejiminin istənilən təhdidinə sərt və qətiyyətli cavab veriləcəyini açıq şəkildə ifadə edib.
Beynəlxalq ictimaiyyətin isə İranın regionda sabitliyi pozmağa yönəlmiş bu cür avantürist planlarına göz yummaması və vaxtında prinsipial mövqe sərgiləməsi vacib sayılır.
Musavat.com
