Texas Universitetinin alimləri müəyyən ediblər ki, atanın təhsil və gəlir səviyyəsi nə qədər yüksəkdirsə, o, qız övladına bir o qədər çox emosional dəstək və qayğı göstərir və daha az nəzarət etməyə meyilli olur.
1xeber.media xəbər verir ki, tədqiqatın nəticələri "Adaptive Human Behavior and Physiology" (AHBP) jurnalında dərc olunub.
Tədqiqatçılar həyat strategiyası nəzəriyyəsi və "qızların qorunması” modeli kimi yanaşmalara əsaslanıblar. Birinci nəzəriyyəyə görə, insanın davranışı və tərbiyə tərzi xarici mühitdən təsirlənir: sabit mühit uzunmüddətli investisiyaları təşviq edir, qeyri-sabitlik isə daha sərt və qısamüddətli yanaşmalara səbəb olur. İkinci nəzəriyyə isə ataların qız övladlarının reputasiyasını qorumaq və risklərdən müdafiə etmək baxımından xüsusilə diqqətli ola biləcəyini irəli sürür.
Birinci mərhələdə 18–21 yaş aralığında olan 120 gənc qız sorğuda iştirak edib. Onlardan atalarını dörd meyar üzrə qiymətləndirmələri istənilib: yaxınlıq, dəstək, müdafiə və nəzarət. Bundan əlavə, iştirakçılar atalarının təhsil və dini inancları, eləcə də öz görünüşlərinə verdikləri qiymət haqqında məlumat veriblər.
Nəticələr göstərib ki, təhsilli ataların qızları onlarla daha güclü emosional bağ hiss edir, daha çox dəstək və müdafiə gördüklərini bildirirlər. Özünü cəlbedici hesab edən qızlar isə atalarının onlara qayğı göstərdiyini, dəstək verdiyini, lakin onları daha az nəzarət altında saxladığını qeyd ediblər.
İkinci mərhələdə ən azı bir qız övladı olan 304 kişi iştirak edib. Onlar da eyni meyarlar üzrə öz davranışlarını qiymətləndiriblər. Daha yüksək gəlirə malik olan kişilər, qızları ilə emosional yaxınlıqlarının daha güclü olduğunu bildiriblər.
