Rusiya Avropa İttifaqının (Aİ) Rusiyaya qarşı qəbul etdiyi 17-ci və 18-ci sanksiya paketlərinə cavab olaraq bir sıra Avropa qurumlarının, Aİ-yə üzv ölkələrin dövlət orqanlarının və digər Avropa ölkələrinin nümayəndələrinin ölkəyə girişinə qadağa qoyduğunu açıqlayıb.
1xeber.media "Eurointegration”a istinadla xəbər verir ki, bu barədə Rusiya Xarici İşlər Nazirliyinin 22 iyulda yaydığı bəyanatda bildirilir.
Deyilir ki, bu qərar Aİ-nin 20 may və 18 iyul tarixlərində təsdiqlədiyi, Moskvanın "qanunsuz" adlandırdığı sanksiyalar paketlərinə cavab olaraq qəbul edilib. Nazirlik qeyd edir ki, sözügedən şəxslər Brüsselin anti-Rusiya siyasətinə qoşulmuş, Rusiya rəsmilərinə qarşı "təqiblərdə", "Ukrayna ərazilərindən insanların qanunsuz tutulması və aparılması"nda iştirak etmiş şəxslərdir.
Rusiya həmçinin aşağıdakı kateqoriyalardakı şəxsləri də sanksiya siyahısına daxil edib:
- Rusiya rəhbərliyinə qarşı tribunal yaradılması təşəbbüslərində iştirak edənlər;
- Rusiya dövlət aktivlərinin müsadirəsini və ya həmin aktivlərdən əldə edilən gəlirlərin Ukraynanın xeyrinə istifadə edilməsini dəstəkləyənlər;
- "Rusofob ritorikası" ilə seçilən şəxslər;
- Aİ ölkələri və Avropa Parlamentinin Rusiyaya qarşı qətnamə və qanun layihələrini dəstəkləyən deputatları.
Qeyd edək ki, 18 iyulda Avropa İttifaqı Rusiyaya qarşı 18-ci sanksiya paketini təsdiqləyib. Bu paket Slovakiya və Maltanın müqaviməti səbəbilə uzun müddət razılaşdırıla bilmirdi. Yeni sanksiyalar paketində aşağıdakılar yer alır:
- Sanksiyalardan yan keçməyə görə daha 26 şirkətə qarşı məhdudiyyətlər, onlardan 11-i Rusiyadan kənardadır: 7-si Çində (3-ü Honq-Konqda), 4-ü isə Türkiyədə;
- Rusiya neftinə tətbiq edilən qiymət tavanının aşağı salınması;
- "Kölgə donanması"na aid 105 gəmiyə qarşı sanksiyalar;
- Rusiyanın hərbi maşınına dəstək verən, Rusiyadan kənarda fəaliyyət göstərən bank və şirkətlərə qarşı məhdudiyyətlər.
Rusiya bildirir ki, bu "dost olmayan addımlara" cavab olaraq, ölkə ərazisinə giriş qadağası tətbiq etdiyi şəxslərin siyahısını xeyli genişləndirib. Bu siyahıya hüquq-mühafizə orqanlarının əməkdaşları, dövlət və kommersiya qurumlarının nümayəndələri, Kiyevə hərbi yardım göstərən və ya Rusiyanın ərazi bütövlüyünü pozmağa cəhd edənlər, həmçinin Baltik dənizində Rusiya gəmilərinin və yüklərinin hərəkətinə blokada təşkil edənlər daxildir.
