Ötən həftə Dövlət Neft Şirkətinin (SOCAR) “Azəriqaz” İstehsalat Birliyi və BƏƏ-nin “Esyasoft Holding LTD” şirkəti arasında ağıllı qaz şəbəkəsinin layihələndirilməsi, qurulması və istifadəyə verilməsi haqqında müqavilə imzalanıb.
1xeber.media xəbər verir ki, bu barədə SOCAR məlumat yayıb.
Yayılan məlumatda bildirilir ki, layihə, 2,5 milyon ağıllı sayğacın quraşdırılması və sistemə dəstək mərhələləri nəzərə alınmaqla təxminən 14 illik dövrü əhatə edəcək. Bu dövr ərzində 480 milyon dollar sərmayənin yatırılması nəzərdə tutulur.
Qeyd edilib ki, müqaviləni SOCAR prezidenti Rövşən Nəcəf, “Azəriqaz” İB-nin baş direktoru Azər Məmmədov və “Esyasoft Holding LTD”nin baş icraçı direktoru Bipin Çandra imzalayıblar.
Məlumat üçün bildirək ki, 20 oktyabr 2023-cü il tarixində “Azəriqaz” İB ilə "Gəncə Cihazqayırma Zavodu" ASC arasında da müqavilə imzalanıb. Ötən həftə BƏƏ şirkətiylə imzalanan müqavilədən fərqli olaraq 2023-cü ildə imzalanan müqavilənin nəticəsində istifadədə olan Almaniya istehsalı ağıllı sayğaclar yerli istehsal olan mexaniki sayğaclarla əvəzləndi. 2 il əvvəl “Azəriqaz”dan verilən açıqlamada deyilirdi ki, Birliyin sayğaclara olan tələbatının yerli istehsalçı tərəfindən təmin edilməsi ilk növbədə idxaldan asılılığı azaldacaq, xarici valyutanın ölkədən kənara çıxmasının qarşısını alacaq. Daha sonra verilən məlumatlarda qeyd olunurdu ki, əldə olunan razılığa əsasən Gəncə Cihazqayırma Zavodu birinci il 200 min ədəd, növbəti illərdə isə 400 min ədəd sayğac istehsal edəcək.
Xatırladaq ki, müqavilə “Azəriqaz”ın sabiq baş direktoru Ruslan Əliyev və ASC-nin icraçı direktoru Ayət Bağırov tərəfindən imzalanıb.
Açıqlanan məlumatlardan da göründüyü kimi, 2 il əvvəl “Azəriqaz” valyutanın ölkədən çıxışının qarşısını almaq üçün ağıllı sayğacları mexaniki sayğaclarla əvəz etmək qərarı verdiyi halda, bu dəfə yerli istehsal olan mexaniki sayğacları ağıllı sayğaclarla əvəz etmək qərarı verib.
Onu da bildirək ki, “Gəncə Cihazqayırma Zavodu” ASC 30.03.2008-cü il tarixində dövlət qeydiyyatına alınıb. Nizamnamə kapitalı 211 min 956 manat olan ASC “Gəncə şəhəri, Vəli Xuluflu, ev 1” ünvanında yerləşir. “Gəncə Cihazqayırma Zavodu” ASC -nin qanuni təmsilçisi Bağırov Ayət Cəlal oğludur.
Onu da bildirək ki, “Gəncə Cihazqayırma Zavodu” ASC ölkənin aparıcı şirkətlərindən olan “Paşa Holdinq”in paylı iştirakı ilə yaradılıb.
Məsələ ilə bağlı SOCAR-ın və “Azəriqaz”ın mətbuat xidmətlərinə sorğu ilə müraciət etsək də, suallarımıza cavab ala bilmədik.
Yeniavaz.com
