Sabiq nazir iddia edir ki, sabitliyi pozmaq üçün bir neçə plan nəzərdən keçirilir - reaksiya
Azərbaycanın keçmiş xarici işlər naziri Tofiq Zülfüqarov Rusiyanın “Z-kanalları”nın ölkəmizə qarşı kütləvi informasiya hücumuna başladığını açıqlayıb. Minval xəbər verir ki, bu barədə o, Facebook hesabında yazıb. Zülfüqarovun sözlərinə görə, o, “ölkəmizin internet məkanına kütləvi hücuma keçmiş” Rusiyanın təbliğat resurslarının fəaliyyətini mümkün qədər izləyib və təhlil edir. Sabiq nazirə görə, mütəşəkkil bir kampaniya belə bir tezis yayır ki, guya Rusiya hakimiyyətinin mövqeyi Azərbaycan xalqına deyil, sadəcə, “Azərbaycanın qərbyönlü hakimiyyəti”nə qarşıdır. Həmçinin Zülfüqarovun fikrincə, “daxili müxalifət” adından ölkə rəhbərliyini tənqid edəcək idarə olunan ruporların meydana çıxması mümkündür.
Zülfüqarov iki ay əvvəl bu istiqamətdə xəbərdarlıq etdiyini xatırladıb: “Qarabağ təzyiq mexanizmi itirildikdən sonra xarici qüvvələr regiona yeni təzyiq modelini işə salmağa çalışacaqlar. Bu gün ölkədə sabitliyi pozmağa cəhd ediləcəyi açıq-aydın görünür, çünki informasiya hücumu artıq başlayıb. Lakin bu cəhdin uğursuzluğa məhkum olduğu da göz qabağındadır, çünki Azərbaycanda cəmiyyətin konsolidasiya səviyyəsi Rusiyanın özündə, məsələn, Gürcüstan və Ermənistandakından xeyli yüksəkdir”.
“Svobodnaya pressa”dakı məqalədə də Zülfüqarovun dediyi təhlükədən xəbər verilir. Politoloq Mixail Neyjmakov nəşrə deyib ki, Azərbaycandakı daxili siyasi vəziyyət vaxtaşırı Amerika konqresmenləri, həm demokratlar, həm də respublikaçılar tərəfindən tənqid edilir. “Məsələn, bu ilin martında Marko Rubioya ABŞ-ın Azərbaycana hərbi yardımını dərhal dayandırmağa çağıran məktubu imzalayan 60 parlamentari arasında hər iki partiyanın nümayəndələri də olub.
“Moskva niyə Azərbaycan müxalifəti ilə işləməməlidir” sualına gəlincə, politoloq deyib ki, Azərbaycan hakimiyyətini tənqid edənlər var. “Amma onların bir qismi ölkədən kənardadır. Moskva ilə yaxınlaşmanın tərəfdarı olanlar da var. Rusiya ilə işləməyə hazır olanları tapmaq mümkündür, lakin indiki şəraitdə bunun ən azı yaxın gələcəkdə Azərbaycan rəhbərliyi üçün real daxili siyasi təhdidlər yaratması çətindir”.
Göründüyü kimi, Rusiyanın bəzi dairələri həqiqətən də Azərbaycanda daxili vəziyyəti gərginləşdirmək planları üzərində işləyirlər. Və bu ssenaridə müxalifətin bir qanadından istifadə də nəzərdən keçirilə bilər. Moskva bu hiyləni əvvəllər də sınaqdan keçirib. Xüsusən də 2013-cü ildə şərti adı “Milyarderlər ittifaqı” olan bəzi azərbaycanlı oliqarxların çətiri altında müxalifətin birliyi təşkil olunmuşdu. Hazırda bu potensial olduqca zəif görünür. Amma daxildə sabitliyi pozmaq üçün Kreml digər “kart”ları da işə sala bilər. Misal üçün etnik separatizm.
Lakin 44 günlük müharibədən sonra Azərbaycan cəmiyyəti daha da rasionaldır və belə oyunlara qarşı müqavimət immuniteti yaranıb. Bu baxımdan, Rusiya daxildən ölkəni necə qarışdıra bilər?
Vətəndaş Həmrəyliyi Partiyasının sədr müavini, professor Elxan Mirzəyevin “Yeni Müsavat”a bildirdiyinə görə, Putinin köməkçisi Peskov da etiraf etdi ki, münasibətlər çətin dövrünü yaşayır: “Açığı, vəziyyətin bu dərəcədə gərginləşməsi arzuolunmaz mənzərədir. Hər şey Rusiyanın hərəkətləri ucbatından baş verib. Kreml isə Bakının strateji addımlarından narazılığını hiss etdirir və acığını çıxmaq üçün təzyiqlərə əl atıb. Zənnimcə, bu prosesin kulminasiyası prezidentlərin telefon söhbəti ola bilər. Əks halda, gərginlik də davam edəcək, azərbaycanlılara qarşı ayrı-ayrı hücumlar da, ölkəmizə hədyanlar da. Ona görə tərəflər əlaqələrin yaxılaşması üçün qarşılıqlı addımlar atmalıdır. Doğrudur, təyyarənin vurulması ilə bağlı haqlı tələbimiz qüvvədədir. Azərbaycan beynəlxalq məhkəməyə də hazırlaşır. Ancaq Rusiya da bizi itirmək istəmirsə, məsələnin böyüməsinə imkan yaratmamalıdır. Əgər təyyarə ilə bağlı tələblər yerinə yetirilərsə, Bakı-Moskva əlaqələrində geridönüş ola bilər”.
E.Mirzəyev Azərbaycan daxilində sabitliyin pozulması üçün müxtəlif təxribat xarakterli addımlar atılmasını istisna etmir. Həmçinin sosial şəraitdən sui-istifadə edilərək vəziyyətin qızışdırılmasını da mümkün sayır: “Amma xalq və dövlət həmrəyliyi mövcuddur. Azərbaycan cəmiyyəti prezidentinə sədaqətlidir və heç bir kənar güc, məkrli niyyəti olan bədxah qüvvələr ölkəmizi içəridən sarsıda bilməzlər. Buna imkan vermərik. Azərbaycanda müxalifət də var, insanların hansısa problemlərdən şikayəti də ola bilər, amma Rusiyanın bundan sui-istifadə etməsi mümkün deyil. Özü də Rusiya heç nə edə bilməz. Çünki postsovet məkanında nüfuzunu itirib və ona kimsə inanmır. Ümumiyyətlə, Rusiya Azərbaycan cəmiyyətində işğalçı, Qarabağ münaqişəsini başımıza açan bir dövlət kimi qəbul olunubsa, ona daxildən dəstək verilə bilməz. Artıq o dövr də deyil ki, burada milli-dini faktorlardan istifadə edə bilsinlər. Azərbaycan xalqı türkü, talışı, ləzgisi, avarı ilə birdir, öz dövlətinə bağlıdır”.
Analitik Elxan Şahinoğlunun sözlərinə görə, Rusiya rəsmiləri hər hansı məsələni diplomatik dillə izah etməyə çalışanda, “Z- blogerlər” düşmən elan etdiklərini söyüş dili ilə hədələyirlər. “İndi bu kütlə Azərbaycanın üstünə tökülüşüb, Prezident İlham Əliyevi düşmən elan ediblər. "Z- blogerlər" Azərbaycana qarşı ikinci cəbhənin açılması vacibliyindən, Bakının bombalanmasından, azərbaycanlıların Rusiyadan kütləvi şəkildə qovulmasından yazır və Kremldən təcili tədbirlər tələb edirlər. Bunlara “başdanxarablar” deyib fikir verməmək də olar. Ancaq Putinin Ukraynaya qarşı başlatdığı işğalçı müharibə fonunda Rusiya cəmiyyətinin bir hissəsi də “Z-blogerlər” kimi düşünür. Əks halda, bu şovinist kəsim Rusiya sosial media seqmentini ələ keçirməzdi", - deyə politoloq qeyd edib.
E.Şahinoğlunun fikrincə, Kreml Azərbaycana qarşı pisliklərini davam etdirir, sadalamağa ehtiyac yoxdur: “Əsas sual budur: Kremlin başbilənləri ölkəmiz əleyhinə daha nələri etməyi planlaşdırırlar? Rusiyanın müxtəlif şəhərlərində diaspora nümayəndələrimizə müxtəlif problemlər yaradacaqlarını, kənd təsərrüfatı məhsullarımızı əvvəlkitək sərhəddən geri qaytaracaqlarını proqnozlaşdırmaq olar. Bu azmış kimi, Rusiya Ukraynaya qarşı işğalçı müharibəyə başladıqdan sonra bu ölkənin dövlət kanallarındakı şovinist aparıcılar, proqramlara çıxardıqları siyasi şərhçilər və "Z-blogerlər" Azərbaycana qarşı təxribatları genişləndirməyi təklif edirlər. Narahat olmalıyıqmı?
Rusiya hərbçiləri “sülhməramlı” adı altında hələ Qarabağda olsaydılar, narahatlıq üçün əsas ola bilərdi. Bu məsələni həll etmişik, 200 ildən sonra ilk dəfə torpaqlarımızda rus hərbçisi yoxdur. Ancaq şimaldan istiqamətlənən müxtəlif təxribatçı ssenarilərə də hazır olmalıyıq. Rusiya İranla Xəzərdə birgə hərbi təlimlər keçirməyə hazırlaşır. Bu təlimlər sırasında iki ölkənin hərbi gəmiləri dəniz sərhədlərimizi poza bilər. Rusiya Dağıstanla sərhədə əlavə qüvvələr cəmləşdirə bilər. Buna qarşı Azərbaycan Türkiyə ilə yanaşı, Mərkəzi Asiyanın türk dövlətləri ilə hərbi təlimlərin sayını artırmağa çalışmalıdır".
“Yeni Müsavat”
