Azərbaycan Cüdo Federasiyası ilə bağlı redaksiyamıza ilginc məlumatlar daxil olub…
Azərbaycan Respublikasının Nəqliyyat, Rabitə və Yüksək texnologiyalar naziri Rəşad Nəbiyevin rəhbərlik etdiyi federasiyada onun adaşı Rəşad Rəsullu sözün həqiqi mənasında at oynadır.
Baş verən qanunsuzluqlara və haqsızlıqlara etiraz etdiyinə görə, bir müddət öncə federasiyadan uzaqlaşdırılan şəxsin Poliqon-a verdiyi məlumata bildirilir ki, nazir Rəşad Nəbiyev federasiyada bütün idarəçiliyi Rəsulluya tapşırıb və federasiyanın fəaliyyəti ilə demək olar ki, maraqlanmır.
"İnam və etibardan sui istifadə edən Rəşad Rəsullu Azərbaycan Cüdo Federasiyasını sözün həqiqi mənasında gəlir ünvanı olan şəxsi obyektinə çevirib. O, iki vəzifəni - Azərbaycan Cüdo Federasiyasının baş katibi və Azərbaycan Cüdo Federasiyasının icraçı vitse-prezidenti vəzifələrini daşımaqla üst-üstə 19 min manat əməkhaqqı alır. Bu da bəs deyilmiş kimi, hər rübün sonunda Rəsullu özü özünə yüksək məbləğdə mükafatlar yazır”, deyə mənbə bildirib.
Mənbənin sözlərinə görə, federasiyanın tam sahibinə çevrilən Rəsullu tədbirlərin keçirilməsi zamanı qiymətləri şişirdir və federasiyanın büdcəsindən artıq pullar çıxarır ki, sonradan yaranmış fərq mənimsənilir.
"Əlindəki külli ixtiyar səlahiyyəti və maddi imkanları Rəşad Rəsullunun hətta tabeliyində olan işçilərin şəxsi həyatına da müdaxilə etmək qədər cəsarətləndirib”, deyən mənbəmiz iddia edir ki, Baş katib birt müddət əvvəl "yuxarılar”a xoş gəlmək üçün icra aparatı işçilərindən birini başqa bir xanımla ailə həyatı qurmağa məcbur edib, qarşı tərəf buna razı olmadıqda isə həmin şəxsi işdən azad çıxarıb.
Bundan başqa mənbəmiz bildirir ki, Rəşad Rəsullunun son addımı həyat yoldaşını federasiyada yüksək əməkhaqqı ilə psixoloq kimi işə götürməsi olub.
Qeyd edək ki, ötən il Paris 2024 Yay Olimpiya Oyunlarında Azərbaycan cüdoçuları iki qızıl medal qazanıblar. Cüdoçularımıza Hidayət Heydərovun və Zalim Kotsayevin bu zəfəri bütün Azərbaycanı qürurlandırdığı kimi, Azərbaycan Cüdo Federasiyasının da ölkəmizdə daha çox tanınmasına, bu idman ocağına olan marağın artmasına səbəb olub. Ötən bir il müddətində isə Cüdo Federasiyasının fəaliyyəti diqqət mərkəzində olsa da, belə görünür ki, idmançılarımızın nəaliyyəti Rəşad Rəsullunun diqqət mərkəzində olmayıb.
Bunu deməyə əsasımız var, çünki federasiyanın rəsmi veb saytında "Federasiya haqqında” bölməsində Hidayət Heydərov və Zalim Kotsayevin möhtəşəm qələbəsi haqqında məlumat belə verilməyib. Bölmədə fedrasiyanın uğurları sadəcə 2020 ildə Yay Olimpiya Oyunlarında İrina Kindzerskanın bürünc medal alması xəbəri ilə yekunlaşır və ötən il qazanılan böyük zəfər isə Federasiyanın tarixi uğurları arasında yer almayıb.
Fedrasiyada iki vəzifə tutmaqla 19 min maaş alan Rəşad Rəsullunun bu boyda tarixi qələbəni unutması və idmançılarımızın tarixi qələbəsinin rəsmi veb saytda qeyd olunmaması görəsən nədən xəbər verir? Bəlkə Rəsullunun maaşını daha da artırmaq lazımdır ki, yediyi çörəyin hardan gəldiyini vəzifəsinin nə olduğunu xatırlasın və Hidayət Heydərovla Zalim Kotsayevin qələbələrinin hələ də Cüdo Federasiyasının rəsmi saytında yerləşdirilmədiyindən xəbər tutsun?
Qeyd edək ki, yuxarıda səsləndirilən iddialrla bağlı Poliqon Cüdo Federasiyasına sorğu ilə müraciət edib. Aradan kifayət qədər vaxt keçməsinə baxmayaraq sorğumuza cavab ala bilməmişik. Bu da bizə qəribə gəlmədi. Çünki olimpiya çempionlarının qələbəsini öz veb saytlarında yerləşdirməyi unudanların e-poçtalara baxmamsında qeyri-təbii heç bir şey yoxdur.
Bütün halalrda səsləndirilən iddalarla bağlı qarşı tərəfin mövqeyini dərc etməyə hazırıq.
