ABŞ-da yaşayan 26 yaşlı Nauje Dreyk qeyri-adi ana təcrübəsi ilə gündəmə gəlib. O, 7 iyul tarixində dördüncü övladını dünyaya gətirib və bu, onun üç əvvəlki uşağının da doğulduğu gündür. Beləliklə, dörd uşaq eyni gündə, lakin fərqli illərdə doğulub.
Qaynarinfo xəbər verir ki, bu barədə "Daily Mail" məlumat yayıb.
Yeni doğulan körpə - oğlan uşağı - Kailova adlandırılıb. Onun böyük bacı və qardaşları - Kevan, Na'Zayla və Halan da əvvəlki illərdə məhz 7 iyul tarixində doğulublar. Maraqlısı ondadır ki, bu doğuşların heç biri əvvəlcədən planlaşdırılmayıb və hər biri təbii şəkildə baş verib.
"Onların hamısının eyni gündə doğulması sadəcə inanılmazdır. İnsanlar mənə deyirlər ki, mütləq lotereya oynamalıyam. Uşaqlarımın eyni gün doğulduğunu deyəndə hər kəs soruşur: "Üçəm idilər?" Mən cavab verirəm: "Xeyr, onlar fərqli illərdə doğulublar".", deyə Nauje Dreyk qeyd edib.
Dreyk xüsusilə 2022-ci ilin 7 iyulunda üçüncü uşağı Halanın doğuş sancıları başladıqda çox təəccübləndiyini deyib və bu tarixin yenidən təsadüf etməsinə əvvəlcə inanmayıb. Lakin bu il dördüncü uşağın da eyni gün dünyaya gəlməsi onun üçün artıq xoşbəxtliyin və taleyin simvoluna çevrilib.
Bu qeyri-adi uyğunluq sosial şəbəkələrdə geniş maraq doğurub, bir çoxları isə Dreykə bu təsadüf üçün "statistik möcüzə” deyə müraciət edir.
