ABŞ-da baş verən və beynəlxalq ictimaiyyətin diqqətini çəkən hadisə, may ayında başlanan dramatik bir proseslə üzə çıxıb.
1xeber.media xəbər verir ki, Los-Ancelesdə xəstəxanaya gətirilən kəllədaxili qanaması olan körpə, polis və FTB-nin diqqətini çəkən genişmiqyaslı araşdırmanın başlanğıcı olub.
Mayın əvvəlində Arcadia şəhərindəki 9 otaqlı dəbdəbəli malikanəyə edilən polis reydi zamanı, ən böyüyü 3 yaşında olmaqla, 15 uşaq və onlara baxan dayələr aşkar edilib. Sonradan Los-Ancelesin digər ünvanlarında 6 uşaq da tapılıb. Uşaqların hamısının qısa müddət ərzində və müxtəlif yerlərdə dünyaya gəlməsi, hüquq-mühafizə orqanlarının şübhələrini artırıb.
İstintaq nəticəsində malikanənin "Mark Surrogacy" adlı kommersiya daşıyıcı analıq agentliyinin mərkəzi olduğu məlum olub. Agentliyin fəaliyyətinə Çin əsilli Silviya Canq rəhbərlik edib. O, uşaqların hamısının özünə məxsus olduğunu iddia etsə də, bəzi daşıyıcı analar, Canq tərəfindən aldadıldıqlarını və həqiqi məqsədlərdən xəbərsiz olduqlarını bildiriblər.
Polis tərəfindən ələ keçirilən təhlükəsizlik kamerası görüntülərində uşaqlara fiziki zorakılıq göstərildiyi, onların zorla oturdulduğu, hətta xəstəxanaya yerləşdirilən körpənin sarsıldığı anlar əksini tapıb. Canq və həyat yoldaşı olduğu bildirilən Quocun Şüen saxlanılsalar da, 4 gün sonra sərbəst buraxılıblar.
İstintaq həmçinin cütlüyün "Yudao Management” adlı daşınmaz əmlak şirkəti vasitəsilə çoxsaylı mülklərə sahib olduğunu və Çinlə biznes əlaqələri saxladığını ortaya çıxarıb. ABŞ-da sürətlə böyüyən, milyardlarla dollar dövriyyəyə malik daşıyıcı analıq sektorunda Çinli ailələrin payının artması, bu işin qanuni çərçivələri ilə bağlı sualları da gündəmə gətirib.
Hazırda 22 uşaq dövlət himayəsindədir və onların hüquqi statusu hələ də qeyri-müəyyəndir. FTB istintaqı davam etdirir, prokurorluq isə yeni həbs qərarlarının mümkünlüyünü istisna etmir.
