Gəncədə 20 hektar ərazidə yerləşən “Grand Qafqaz Ticarət Kompleksi” (“Gəncə Bazar Store” MMC) banka olan kredit borcuna görə hərraca çıxarılır. “Xalq Bank”dan götürülmüş 5 milyon kreditin əvəzində girov qoyulan əmlakın hərraca çıxarılaraq satılması və banka olan borcun ödənilməsi barədə artıq məhkəmə qərar çıxarıb.
1xeber.media bildirir ki,Gununsesi.info-nun özəl mənbələrə istinadən verdiyi xəbərə görə, bankdan götürülmüş 5 milyon manatlıq kreditin 3 milyon 800 mini qaytarılmayıb.
Bank bu vəsaitlə yanaşı, 99 min 996 manat faiz borcu, gecikmənin hər günü üçün illik 30 faiz dərəcəsi hesablanmaqla, 250 min 589 manat da cərimə olmaqla, ümumilikdə 4 milyon 182 min manat pul tələbi ilə məhkəmədə iddia qaldırıb. Tələb olunub ki, məhkəmə borcun girov qoyulmuş əmlakın yönəldilməsinə qərar versin.
Məhkəmə də bu tələblə razılaşıb və Gəncədəki məşhur ticarət kompleksinin hərraca çıxarılıb satılmasına, əldə olunan vəsaitin bankın pulunun ödənişinə yönəldilməsinə qərar verib.
Əmlak sahibləri krediti ödəmədiklərini etiraf edir. Onları narazı salan əsas məsələ məhkəmənin əmlakla bağlı qiymətləndirməsidir – 7 milyon 900 min manat.
“Hələ 2015-ci ildə kredit götürüləndə kompleks yarım tikili vəziyyətdə olanda 9 milyon manat qiymətləndirilmişdi. Bankdan götürülən kredit bu əmlakın üstünə qoyuldu, tikildi, təmir oldu və təbii ki, qiyməti də dəfələrlə artdı. 2017-ci ildə bu əmlakın likvid dəyəri 25 milyon manat olub. Çox təəssüf ki, məhkəmə zamanı təyin edilmiş qiymətləndirmə əmlaka baxış keçirilmədən aparılıb. Nəticədə 2015-ci ildə yarım tikili halda qoyulmuş qiymətdən daha aşağı qiymət qoyulub. Halbuki, qiymətləndirmə şirkətinin bizə verdiyi rəydə kompleksin bazar dəyəri 28 milyon, likvid dəyəri 25 milyon göstərilib”, – şirkətin nümayəndəsi bildirib.
Onlar məhkəmənin qərarından apellyasiya şikayəti verib.
Apellyasiya məhkəməsinin gedişində “MBA LTD” MMC qiymətləndirmə şirkətindən yeni rəy alınıb. Bu şirkət əmlaka 18 milyon 400 min manat qiymət qoyub.
Qeyd edək ki, 2017-ci ilin noyabrında “Grand Qafqaz” Ticarət Kompleksinin açılışında Prezident İlham Əliyev də iştirak etmişdi. O zaman Gəncədə əhali arasında yeni bazarın icra başçısı Elmar Vəliyevə məxsus olması barədə söhbətlər yayılmışdı.
Yeri gəlmişkən, Elmar Vəliyev Gəncədən əvvəl Yevlaxın icra başçısı olub, onun bu rayonda da bir çox obyektlərə sahib olduğu bildirilirdi.
Gununsesi.info-nun məlumatına görə, “Xalq Bank”a Gəncədə 2015-ci ildə “Grand Qafqaz” tikilən ərəfədə həmin komplekslə yanaşı, Yevlaxda da dəyəri 4,5 milyona yaxın olan iki obyekt girov qoyularaq əlavə kredit götürülüb, lakin pul ödənilmədiyinə görə onların da məhkəmə qərarı ilə hərraca çıxarılıb.
