Ermənistan Milli Məclisinin spikeri Alen Simonyan iki ölkə arasında uzunmüddətli perspektivdə münasibətlərin normallaşmasının qaçılmaz olduğunu bəyan edib.
Onun sözlərinə görə, Azərbaycan və Ermənistan arasında gələcəkdə vahid bazar formalaşacaq, qarşılıqlı ticarət adi hala çevriləcək.
Simonyan çıxışında bildirib ki, ermənilər və azərbaycanlılar bu gün Moskvada və digər ölkələrdə birgə biznes qurur, dostluq edir, sosial münasibətlər saxlayırlar: “Bizim mağazalarda Azərbaycan malları olacaq, Bakı və digər şəhərlərdə isə erməni məhsulları satılacaq. İndiki gərginlik və düşmənçilik hissləri zamanla yox olacaq.”
O, eyni zamanda müharibə illərində hər iki tərəfin böyük itkilər verdiyini xatırladaraq əlavə edib: “Biz də adam öldürmüşük, Azərbaycan tərəfdən də insanlar həlak olub. Hər iki xalqın yaraları hələ təzədir, amma bu həssaslıq tədricən azalacaq.”
Spikerin sözlərinə görə, hazırda əsas prioritet mümkün qədər tez bir zamanda regionda kommunikasiya xətlərinin açılmasıdır. Bu, həm iqtisadi inteqrasiya, həm də sülh prosesinə inamın möhkəmlənməsi üçün vacib addım kimi qiymətləndirilir.
Simonyanın çıxışı Bakıda da maraqla qarşılanıb.
1xeber.media xəbər verir ki,Milli Məclisin İqtisadi siyasət, sənaye və sahibkarlıq komitəsinin sədr müavini Azər Badamov Modern.az-a deyib ki, sülh sazişi imzalandıqdan sonra iki ölkə arasında diplomatik münasibətlər bərpa olunmalı, ardınca isə iqtisadi əlaqələr genişlənməlidir.
O qeyd edib ki, Ermənistanda Azərbaycanın neft, qaz və kimya sənayesi məhsullarına tələbat var: “Gələcəkdə "İstisu" mineral sularımız və Ağdam şərabımız da orada satıla bilər. Burada qeyri-adi heç nə yoxdur.”
Deputat eyni zamanda əsas maneənin Ermənistan konstitusiyasında Azərbaycana qarşı saxlanılan ərazi iddiaları olduğunu xatırladıb. Bakı dəfələrlə bəyan edib ki, bu müddəa dəyişdirilmədən yekun sülh müqaviləsi imzalanmayacaq. Vaşinqtonda paraflanmış saziş layihəsi isə göstərir ki, tərəflər razılığa yaxınlaşmaq istiqamətində mühüm addımlar atır.
Milli Məclisin deputatı Vüqar Bayramov isə iqtisadi əlaqələrə diqqət çəkib. Onun sözlərinə görə, kommunikasiya xətlərinin açılması və yekun sazişin imzalanması regionda ticarət əlaqələrinə də yol açacaq: “Müqayisəli üstünlüyə malik məhsullar Ermənistan bazarına çıxarıla bilər. Əsasən qeyri-neft sektoruna aid malların ixracı daha real görünür. Ermənistan da müəyyən məhsullar ixrac edə bilər. Amma iş adamlarının əməkdaşlıq ənənəsinin formalaşması üçün zamana ehtiyac olacaq.”
Ekspertlər hesab edirlər ki, Ermənistan Konstitusiyasında dəyişiklik edilərsə, yekun sülh müqaviləsinin imzalanması və iqtisadi əməkdaşlığın genişlənməsi real perspektivə çevriləcək.
