İranın Luristan əyalətində helikopter qəzası baş verib. Bu barədə Qızıl Aypara Təşkilatının bölgə üzrə nümayəndəsi Əli Məhəmmədi məlumat verib.
1xeber.media xəbər verir ki, helikopter Oştorankuh dağ massivində 4 000 metr yüksəklikdə itkin düşən qadının axtarış-xilasetmə əməliyyatı üçün göndərilib. Lakin uçuş zamanı hava gəmisində nasazlıq yaranıb və o, 2 800 metr hündürlükdə qəzaya uğrayıb.
Məlumata görə, göyərtədə 8 nəfər olub. Hazırda hadisə yerinə Luristandan altı əməliyyat qrupu cəlb edilib, axtarış və xilasetmə işləri davam etdirilir.
Qəza bölgədə hava şəraitinin çətinliyi fonunda baş verdiyi bildirilir.
