Göygöl Rayon İcra Hakimiyyətinin təşkilatçılığı, Aqrar İnnovasiya Mərkəzi, Dövlət Turizm Agentliyi, Azərbaycan Şərab İstehsalçıları və İxracatçıları Assosiasiyası, digər dövlət və özəl qurumların tərəfdaşlığı ilə Göygöl şəhər Heydər Əliyev adına Mədəniyyət və İstirahət Parkında “Göygöl Brendi - Konyak Günü” tədbiri keçirilir.
1xeber.media-nın bölgə müxbiri xəbər verir ki, proqram çərçivəsində müxtəlif brenddə konyak və üzüm məhsullarının təqdimatı, dequstasiyası və satış yarmarkaları təşkil olunub, içki istehsalı üzrə ustad dərsləri və brendi üzrə peşəkar yarışlar keçirilir, həmçinin tədbir iştirakçıları üçün zövqlü musiqi proqramları, klassik musiqi axşamları, milli mətbəx guşələri, əl işləri sərgiləri və digər istirahət zonaları fəaliyyət göstərir.
Bu il “Müstəqil Dövlətlər Birliyinin idman paytaxtı” elan edilən Gəncə şəhərində keçirilən III MDB Oyunlarının iki idman növü üzrə yarışlar Göygöl şəhərində təşkil olunur. MDB oyunlarının keçirildiyi tarix ilə Brendi-Konyak Günlərinin keçiriləcəyi tarixin üst-üstə düşməsi Göygölə gələcək yerli və xarici qonaqlara xoş anlar yaşatmaqla yanaşı, yerli məhsulların daha geniş auditoriyaya tanıdılmasına, bölgənin turizm və istehsal potensialının nümayişinə xidmət edəcək.
Qeyd edək ki, Azərbaycanda ilk konyak zavodunun təməli 1892-ci ildə Helenendorf kəndində (indiki Göygöl şəhəri) "Forer qardaşları" tərəfindən qoyulub. 1895-ci ildə isə "Hummel qardaşları" tərəfindən Helenendorfda konyak zavodu açılıb.
Bu gün də bölgənin aparıcı istehsalçıları həm ənənəvi istehsal üsullarını qorumaqla, həm də müasir texnologiyaların tətbiqi ilə Azərbaycanın brendi və konyak istehsalında lider mövqelərini qoruyub saxlayır, məhsul keyfiyyəti ilə beynəlxalq bazarlarda tanınırlar.
