Bu gün və sabah Türk Dövlətləri Təşkilatının (TDT) növbəti rəsmi zirvə toplantısı keçiriləcək.
Artıq TDT-yə üzv ölkələrin liderləri Qəbələdə keçiriləcək tədbirdə iştirak üçün ölkəmizə yola düşüblər.
Qeyd edək ki, TDT-nin hazırda 5 üzvü var - Azərbaycan, Türkiyə, Qazaxıstan, Qırğızıstan və Özbəkistan.
Türkmənistan, Macarıstan və Şimali Kipr Türk Respublikası isə təşkilatda müşahidəçi üzvlərdir. Türkmənistan son illərdə TDT-yə maraq göstərməsi onun tamhüquqlu üzv ola biləcəyi barədə ehtimalları artırıb.
Bu toplantıda Türkmənistanın TDT-yə tamhüquqlu üzv olması məsələsinin də müzakirə ediləcəyi gözlənilir. Qeyd edək ki, Türkmənistandan Xalq Məsləhətinin sədri Qurbanqulu Berdiməhəmmədovun tədbirdə iştirakı edəcəyi bildirilib.
1xeber.media xəbər verir ki,Modern.az-a açıqlamasında Milli Məclisin Azərbaycan-Türkmənistan Parlamentlərarası İşçi Qrupunun üzvü Elman Məmmədov Türkmənistanın Qəbələ görüşündə TDT-yə daimi üzv ola biləcəyini istisna etməyib.
"Həm də, məncə bu zərurətdir. Türkmənlərin adı özü bunu diqtə edir. Türkmən, yəni türk mənəm. Böyük türkmən elləri, türkmən bəyləri, onların tarixi bizə bəlidir. Türkmənistanın bu təşkilatdan kənarda qalması heç də xoşagələn hal deyil. Təbii ki, Türkmənistan TDT-nin daimi üzvü və fəal iştirakçısı olmalıdır. Qurbanqulu Berdiməhəmmədovun da tədbirdə iştirak üçün ölkəmizə gəlişi bundan xəbər verir. Çünki Türkmənistanın ağsaqqalı, rəhbəri o hesab olunur", - Deputat qeyd edib.
O, Qəbələ Zirvə Görüşünün böyük türk dünyasının birliyi üçün vacib toplantı olacağını bildirib.
Xatırladaq ki, Zirvə Toplantısında Türkiyə Prezidenti Rəcəb Tayyib Ərdoğan, Qazaxıstan Respublikasının Prezidenti Kasım-Jomart Tokayev, Özbəkistan Respublikasının Prezidenti Şavkat Mirziyoyev, Qırğız Respublikasının Prezidenti Sadır Japarov, Macarıstanın Baş naziri Viktor Orban, Şimali Kipr Prezidenti Ersin Tatarın da iştirakı gözlənilir.
