“Azərbaycanda ərizə və şikayətlərə niyə 30 gün ərzində cavab verilsin? Bununla bağlı normativ hüquqi aktlara bənd əlavə edək ki, Azərbaycanda ərizə və şikayətlərə 10 gün ərzində cavab verilsin”.
1xeber.media xəbər verir ki, bunu deputat Səyyad Aran Milli Məclisin bu gün keçirilən plenar iclasında bildirib.
“Əndirəbadi cəhət odur ki, ayın 1-dən məktub yazırsan, qəsdən gözləyib ayın 30-31-də cavab verirlər. Məsələn, səbəb torpaq mübahisəsidir. Bunu 30 gün düşünmək, nələrisə araşdırmaq nəyə lazımdır? Buna konkret cavab verilsin ki, məsələ nədir və şikayətçi də rahat olsun. Xahiş edirəm ki, bu məsələyə ciddi münasibət bildirilsin”, - deyə deputat bildirib.
Spiker Sahibə Qafarova deputatın təklifinə münasibət bildirib: “Əslində iki həftə ərzində məktuba cavab olur, hansısa araşdırmalar lazımdırsa, 30 gün ona lazımdır. Hansı məktublarınıza cavab verilməyibsə, xüsusilə bu məsələ ilə məşğul olaq. Siz komitə iclasında da bu məsələni qaldırmışdınız və mən dərhal bu məsələ ilə məşğul oldum. Mənə deyilən o idi ki, belə bir məktub yoxdur. Əgər siz sonra məktub yazmısınızsa və cavab gəlməyibsə, mütləq bu məsələ ilə məşğul olacağam”.
