“Caspel” MMC iki dövlət qurumunun keçirdiyi tenderlərin qalibi olub.
1xeber.media xəbər verir ki, həmin tenderlərdən biri Dövlət Vergi Xidmətinin keçirdiyi olub.
Belə ki, 2025-ci il üzrə şəbəkə sisteminin qurulması (SKS) ilə bağlı olan müsabiqəyə görə, “Caspel” MMC-yə 258 min 607 manat ödənilib.
İkinci tender isə TƏBİB-in balansında olan “Yeni Klinika” ilə bağlıdır. Klinika kamera sistemi və ona aid mallar, xidmətləri almaq üçün “Caspel”lə satınalma müqaviləsi bağlayıb. Həmin müqavilənin dəyəri isə 396 min 673 manat təşkil edib.
Tribunainfo.az açıq mənbələr üzərindən “Caspel” MMC ilə bağlı araşdırma aparıb. Məlum olub ki, bu şirkət 2019-2024-cü ilin aprel ayına qədər ümumi dəyəri 43 milyon 680 min manatdan artıq tender alıb.
Həmin mənbələrdə qeyd olunur ki, 2005-ci ildə yaranması ilə təkcə kassa aparatlarının satışından rəsmi olmayan rəqəmlərə görə, 100 milyonlarla manat əldə edən “Caspel”in arxasında kimlərin dayandığı məlum deyil. Bilinən odur ki, “Caspel Holdiq”in təsisçisi 2020-ci ildəki sənədlərə görə 2023-cü ilin dekabrına qədər holdinqin idarə heyətinin sədri olan Namiq Məmmədovun həyat yoldaşı Nailə Məmmədovadır.
Xatırladaq ki, “Caspel” 2005-ci ilin avqust ayında yaradılıb. Şirkətin ilk qanuni təmsilçisi Namiq Məmmədov olsa da, Dövlət Vergi Xidmətinin reyestr məlumatlarına görə sonradan qanuni təmsilçi Ceyhun Quliyev olub.
Ceyhun Quliyev keçmiş Vergilər naziri Fazil Məmmədovun kürəkəni Namiq Quliyevin qardaşıdır. Namiq Quliyev özü isə 2017-ci ilin dekabrına qədər Vergi Cinayətlərinin İbtidai Araşdırma Departamentinin birinci müavini olub.
Araşdırmalar zamanı o da məlum olub ki, “Caspel”in udduğu bəzi tenderlər Etender-də qeydə alınmayıb. Məsələn, 2010-2021-ci illər aralığı ilə bağlı dövlət satınalmalarının vahid internet portalında olmayan və “Caspel” MMC-nin qalib gəldiyi tenderlərin ümumi məbləği 39 milyon 600 min manatdan artıqdır.
Qarşı tərəfin də fikirlərini dərc etməyə hazırıq.
