Türkiyədə barəsində casusluq ittihamı ilə istintaq aparılan İstanbul bələdiyyəsinin sabiq sədri Əkrəm İmamoğlunun işində Azərbaycanla bağlı hissə diqqət çəkib.
Sitat:
“Şübhəli şəxs Hüseyn Gün 2005-ci ildə ABŞ -da fəaliyyət göstərən hüquq bürosu vasitəsilə “Freedom LLC” adlı şirkətin yaradılmasını təşkil edib. Onun sözlərinə görə, bu şirkət vasitəsilə “Azərbaycanın demokratikləşməsi adı altında” bəzi şəxslərə, o cümlədən həmin dövrdə Müsavat Partiyasının sədri olan İsa Qəmbərə maliyyə dəstəyi göstərilib”.
İsa Qəmbər yerli mediaya açıqlamasında şirkətin adını ilk dəfə eşitdiyini deyərək, iddianı təkzib edib. Amma sözügedən məsələnin hələ də qaranlıq qaldığı bildirilir.
1xeber.media xəbər verir ki,Globalinfo.az-a danışan siyasi şərhçi Heydər Oğuz deyib ki, Əkrəm İmamoğlunun istintaqı zamanı ortaya çıxan bu faktlar və iddialar tamamilə əsaslı ola bilər:
“Çünki Azərbaycanla Türkiyə qardaş dövlətdir. Zaman-zaman Ankaradan Bakıya müxtəlif təşkilatlar və şəxslər yardımlar göstərib. Bunları qəbul edənlərin casusluq məqsədi güddüyünü düşünmürəm. Böyük ehtimalla, onlar bunu qardaşlıq münasibətinin, qarşılıqlı dəstəyin təzahürü kimi qəbul ediblər. Əgər İsa Qəmbər bu iddiaları təkzib edirsə, deməli, ya bu faktlar mövcud olmayıb, ya da hadisələr çox əvvəl baş verdiyi üçün detalları unudub. Hər halda, sözügedən məsələ kifayət qədər ciddidir. Əgər hadisə 2005-ci ildə baş veribsə, həmin dövrdə ölkədə siyasi hakimiyyət zəif idi. Xüsusilə 2003-cü il seçkilərində İsa Qəmbərin hakimiyyətə gəlmə ehtimalı barədə danışılırdı və o, həmin dövr üçün iddialı siyasi fiqurlardan biri hesab olunurdu. Bu səbəbdən Türkiyədən ona və ya partiyasına dəstək göstərilməsi ehtimalı tamamilə mümkündür”.
Siyasi şərhçi bildirib ki, Azərbaycan hakimiyyəti belə informasiyalara ciddi yanaşmalıdır:
“Burada söhbət ABŞ-da fəaliyyət göstərən hüquq təşkilatları ilə mümkün əlaqələrdən gedir. Həmin dövrdə FETÖ-nün ABŞ-dakı fəaliyyəti güclü idi və bu qurum müxtəlif vasitələrlə dəstək alırdı. Ona görə də bu hadisələrdə onun izlərinin olub-olmaması diqqətlə araşdırılmalıdır. Məsələ yalnız İsa Qəmbər və ya Müsavat Partiyası ilə məhdudlaşmamalıdır. Digər siyasi partiyalar da daxil olmaqla, bütün qurumların maliyyə mənbələri araşdırılmalı, kənar təsirlərin olub-olmaması müəyyən edilməlidir. FETÖ həm Azərbaycan , həm Türkiyə, həm də ümumilikdə türk dünyası üçün ciddi təhlükə mənbəyidir”.
