Azərbaycan Milli Məclisi dünya ölkələri arasında yeganə parlamentdir ki, Büdcə komitəsi yoxdur. Türkiyə, hətta zamamında məcburən bir yerdə olduğumuz MDB ölkələri belə, hamısının parlamentində Büdcə komitəsi var.
Bununla yanaşı, əksər ölkələrin nəinki parlamentlərində belə komitələr var, hətta dövlət qurumları sırasında büdcə nazirlikləri fəaliyyət göstərir.
1xeber.media xəbər verir ki, Azərbaycan Milli Məclisində də sözügedən sahəyə aid komitə yaradılacaq. Yeni komitənin Büdcə və iqtisadiyyat adlandırıla biləcəyi gözlənilir.
Bundan başqa Milli Məclisdə Texnologiya, infrastruktur və süni intellekt komitəsinin də yaradılacağı söylənilir. Qeyd edilir ki, bu, dünyanın yeni çağırışları ilə ayaqlaşmaq və rəqabətlilik üçün əsasdır.
Məsələyə münasibət bildirən Milli Məclisin deputatı Azər Badamov Modern.az-a bildirib ki, hər bir ölkənin parlamenti dövlət siyasətini uğurla həyata keçirən lazımı komitələri yaradır.
“Bir çox parlamentlərdə Büdcə komisyaları fəaliyyət göstərir. Bu komisiya birbaşa dövlət büdcəsi işləri ilə məşğuldur. Amma bu o demək deyil ki, biz də mütləq şəkildə belə bir komitə yaratmalıyıq. Ölkəmizin parlamentində İqtisadi siyasət, sənaye və sahibkarlıq komitəsi var. Bu komitədə dövlət büdcəsi məsələlərinə baxılır və plenar iclasın gündəliyinə təqdim olunur. Yəni Milli Məclisin müvafiq komitənin profili daha genişdir. Bu baxımdan ayrıca bir büdcə siyasəti komitəsinin yaradılacağını güman etmirəm. Həm də büdcə məsələləri mütəmadi müzakirə olunmur. Ölkəmizdə ildə bir və ya iki dəfə dövlət büdcəsi parlamentin müzakirəsinə çıxarılır ki, İqtisadi siyasət, sənaye və sahibkarlıq komitəsi bu işin öhdəsindən uğurla gəlir”, - deputat qeyd edib.
