Dövlət hakimiyyətini ələ keçirmək və dövlətə xəyanətdə ittiham olunaraq barəsində ev dustaqlığı tədbiri seçilən Prezident Administrasiyasının sabiq rəhbəri Ramiz Mehdiyev barəsində xoş sözlər söyləyən, özünü onun kadrı hesab edən daha bir vəzifəli şəxsin adı açıqlanıb.
1xeber.media Pravda.az-a istinadla xəbər verir ki, bu şəxs Prezidentinin Administrasiyasının Hüquq ekspertizası şöbəsinin sabiq müdiri, Ədliyyə Nazirliyinin Ədliyyə Akademiyasının rektoru Şahin Əliyevdir.
Ş.Əliyev söylədiyi tərifdolu çıxışında Ramiz Mehdiyevin onun insan kimi formalaşmasında mühüm rol oynadığını bildirir.
Özünü Mehdiyevin şərəfli kadrı adlandıran şəxsin çıxışını təqdim edirik: “Ramiz Mehdiyev haqqında ürək sözlərimi demək mənim üçün böyük şərəfdir. Ramiz müəllimlə 25 ildir, tanışıq, onun rəhbərliyi altında çalışıram. 25 illik təcrübə mənim insan kimi formalaşmağımda böyük bir məktəb olub. Bu məktəbin misli yoxdur. Həm dövlətçilik məktəbidir, həm də yüksək idarəetmə mədəniyyəti məktəbidir. Ramiz müəllimdə olan dövlətçilik və idarəetmə təcrübəsi indiki dövlət qulluqçularının az qismində var. Bu, təsadüfi deyil ki, xalqın tələbi ilə ulu öndər Heydər Əliyev hakimiyyətə qayıtdıqdan sonra Ramiz müəllimi Prezident Administrasiyasına dəvət edib. 1990-1993-cü ilin birinci yarısınadək Prezident Administrasiyası, sözün əsl mənasında, yox idi, hərc-mərclik hökm sürürdü. Məhz bu cür halların qarşısını almaq üçün ulu öndər yeganə lazımi seçimi etmişdi, və bu, Administrasiyanın formalaşması üçün ən zəruri olan insanı dəvət etmişdi. İllər ötdükcə sübut olundu ki, düzgün seçim edilib. Prezident Administrasiyası spesifik orqandır. Biz bilavasitə cənab Prezidentin qarşısında məsuliyyət daşıyırıq, bu məsuliyyəti necə dərk etmək, necə hiss etmək, necə rəhbər tutmaq – hamısını Ramiz Mehdiyev öyrətmişdi. Leninin populyar olmuş sözləri var idi ki, dövlət idarəetməsini hər bir qabyuyan bacarmalıdır. Bu vaxt Platonun sözləri yaddan çıxarılmışdı. O yazmışdı ki, dövlət idarəetməsi elmdir, bu elmi hər bir insan dərk etmək iqtidarında deyil. Ramiz müəllim və bizim iş təcrübəmiz Platonun sözlərini təsdiqlədi. O yüksək idarəedicilik mədəniyyəti Administrasiyada məktəbə çevrilmişdi. Hər bir yeni Administrasiya işçisi məktəbin qısa bir hissəsini keçdikdən sonra görür ki, doğrudan da, Prezident Administrasiyası Ramiz müəllimin rəhbərliyi altında saat kimi işləyir və bizim üzərimizə qoyulan bütün tapşırıqlar vaxtında, yüksək məsuliyyətlə icra olunur. Bu da Ramiz müəllimin çox böyük zəhməti nəticəsində olur”.
Bu çıxış sosial şəbəkə platformalarında müzakirələrə səbəb olub. Bildirilib ki, Ramiz Mehdiyev vəzifədə olduğu illərdə əksər sahələrə öz adamlarını yerləşdirib, indi də həmin şəxslər ona canla-başla qulluq edirlər. Qeyd olunub ki, bu şəxslərin hər biri ifşa olunmalıdırlar.
