“Azərbaycan Dəmir Yolları” QSC işğaldan azad edilmiş ərazilərdə dəmiryol infrastrukturunun yenidən qurulması istiqamətində bir sıra mühüm layihələr həyata keçirir. Onlardan ən irisi Horadiz-Ağbənd dəmir yolu xəttinin inşasıdır. Hazırda bu xətt üzrə tikinti işləri sürətlə davam etdirilir.
Bu barədə “Azərbaycan Dəmir Yolları” QSC-dən məlumat verilib.
Bildirilib ki, ümumi uzunluğu 110,4 km (yan yollarla birlikdə 140,6 km) olan Horadiz-Ağbənd dəmir yolu xətti boyunca 8 yeni stansiyanın - Yuxarı Mərcanlı, Şükürbəyli, Soltanlı, Qumlaq, Həkəri, Mincivan, Bartaz və Ağbənd stansiyalarının inşası nəzərdə tutulub.
Horadiz-Ağbənd layihələndirmə işlərinin 85%-i, tikinti-quraşdırma işlərinin isə 68%-i tamamlanıb. Hazırda xəttin 75-106 km-lik hissəsində torpaq işləri və mühəndis qurğularının tikintisi davam etdirilir. Tikinti-quraşdırma prosesi üç mərhələdə həyata keçirilir. Artıq 1 tunelin və 1 qalereyanın inşası yekunlaşmaq üzrədir, eyni zamanda 1 körpü və 3 tunelin tikintisi davam edir.
Horadiz-Ağbənd xətti boyunca 600-ə yaxın süni mühəndis qurğusunun, yəni körpülərin, keçidlərin və tunellər inşa olunur. Onlardan biri uzunluğu 771 metr və 20 aşırıma malik olmaqla bu günə qədər ölkəmizdə tikilmiş ən uzun dəmir yolu körpüsüdür. Ümumilikdə 40 körpü inşa olunur.
Layihə çərçivəsində dəmir yolunun üçüncü mərhələsi üzrə 3, ümumilikdə isə 4 tunel tikilir. Onlardan biri uzunluğu 677 metr olan tunel Azərbaycanın müstəqillik dövründə qapalı üsulla inşa edilən ilk dəmir yolu tunelidir. Digər tunel isə 1071 metr uzunluqla ölkəmizin ən uzun dəmir yolu tunelidir. Hər iki tunelin tikintisində müasir texnologiyalar və beynəlxalq standartlar tətbiq olunur.
ADY-dən verilən məlumata görə, işlər başa çatdıqdan sonra Horadiz-Ağbənd xəttinin illik buraxılış qabiliyyəti 15 milyon ton təşkil edəcək.
Layihənin I mərhələsi (0-30 km) üzrə Horadiz, Yuxarı Mərcanlı və Şükürbəyli stansiyalarını əhatə edən hissədə tikinti-quraşdırma işlərinin 89%-i tamamlanıb, 13 körpü və 62 müxtəlif təyinatlı keçid inşa edilib.
II mərhələdə (30-85 km) Soltanlı, Qumlaq, Həkəri və Mincivan stansiyalarını əhatə edən hissədə işlərin 80%-i yekunlaşıb. Bu mərhələdə 22 körpü, 5 yolötürücü və üst keçid, 5 alt keçid tikilib, 1 tunel və 1 qalereyanın tikintisi başa çatmaq üzrədir.
Horadiz-Ağbənd dəmir yolu xəttinin III mərhələsi üzrə xəttin Mincivan, Bartaz və Ağbənd dəmir yolu stansiyaları da daxil olmaqla 85-110 km hissəsi üzrə işlərin 44%-i başa çatıb, 4 körpü tikilib, 1 körpünün və 3 tunelin inşası davam etdirilir.
Bu istiqamətdə yük əməliyyatlarının daha səmərəli həyata keçirilməsi üçün Osmanlı-İmişli xəttinin də yenidən qurulması nəzərdə tutulur.
Bərdə-Ağdam dəmir yolu xəttinin tikintisi isə başa çatıb və yol istismara verilib. Bu ilin 30 avqustunda 32 ildən sonra ilk dəfə Bakı-Ağdam-Bakı marşrutu üzrə sərnişin daşımaları bərpa olunub. Artıq Bakıdan Ağdama və əks istiqamətdə sərnişinlər müasir qatarlarla səyahət edə bilirlər. Bu xətt boyunca Bərdə, Köçərli stansiyaları və Təzəkənd dayanacaqları da sərnişinlərin xidmətindədir. Mayın 10-da cənab Prezidentin iştirakı ilə Ağdam Dəmir Yolu və Avtovağzal Kompleksinin açılışı olub.
Həmçinin Bərdə-Ağdam dəmir yolu xəttinin davamı olaraq uzunluğu 28 km olan Ağdam-Xankəndi dəmir yolu xəttinin yenidən qurulması işlərinə başlanılıb. Layihə çərçivəsində 3 stansiyanın (Əsgəran, Xocalı, Xankəndi), 121 mühəndis qurğusunun inşası nəzərdə tutulur.
Artıq dəmir yolu xəttinin layihələndirilməsi, eyni zamanda, 4 ədəd körpü, 5 ədəd yolötürücü, 3 ədəd piyada keçidi, 4 ədəd suötürücü boru üzrə layihələndirmə işləri tamamlanıb. Hazırda mühəndisi qurğular üzrə layihələndirmə işləri davam edir, həmçinin Əsgəran və Xocalı stansiyalarının konsept layihələri hazırlanır. İyulda cənab Prezident tərəfindən təməli qoyulan Xankəndi Dəmir Yolu və Avtovağzal Kompleksinin layihələndirilməsinə başlanılıb.
