Son zamanlar bəzi ticarət obyektlərində azyaşlı uşaqların reklam predmetinə çevrilməsi ilə bağlı narahatlıqlar artıb. Belə ki, uşaqlara yaşlarına uyğun olmayan rəqslər etdirilir və məhsulların tanıtımında iştiraka məcbur edilirlər.
Məsələ ilə bağlı 1xeber.media-nın sorğusuna cavab olaraq Ailə, Qadın və Uşaq Problemləri üzrə Dövlət Komitəsindən bildirilib ki, bir sıra ticarət obyektlərində azyaşlıların reklam məqsədilə çəkilişlərə cəlb edilməsi ciddi narahatlıq doğurur.
Qeyd olunub ki, xüsusilə də uşaqlara yaşlarına uyğun olmayan rəqslər oynatmaq, davranışlara məcbur etmək yolverilməzdir:
“Hazırda bu istiqamətdə monitorinqlər aparılır. Azyaşlıların istismarı, onların inkişafına mənfi təsir göstərə biləcək hər hansı kommersiya fəaliyyətinə cəlb edilməsi qanunvericiliklə qadağandır. Məlumat daxil olduqda aidiyyəti dövlət qurumları tərəfindən müvafiq tədbirlər görülür, müəssisələrə xəbərdarlıqlar edilir və pozuntu halları aşkar olunarsa məsuliyyətə cəlb olunurlar”.
Dövlət Komitəsi məsələyə nəzarət mexanizmlərini gücləndirməyi planlaşdırır:
“Biz uşaqların maraqlarının hər kəsdən üstün tutulmasını vacib sayırıq. Bu kimi hallarla bağlı ictimai məlumatlanmanın artırılması, həmçinin nəzarət mexanizmlərinin gücləndirilməsi istiqamətində işlər davam etdirilir”.
