Əməkdar jurnalist Fadil Paşayev sosial şəbəkədə qızı ilə bağlı tibbi sənədlərdə aşkarlanan səhv barədə məlumat yayıb.
1xeber.media xəbər verir ki, o məsul dövlət qurumlarını məsələyə müdaxilə etməyə çağırıb.
Paşayev bildirib ki, qızının işə qəbul üçün aldığı sağlamlıq arayışından bir müddət sonra TƏBİB-in elektron sistemində onun adına “Yakob xəstəliyi zamanı demensiya” diaqnozunun yerləşdirildiyi üzə çıxıb. Jurnalistin sözlərinə görə, bu qeydin sistemdə görünməsi ailəsində ciddi narahatlıq yaradıb.
O qeyd edib ki, məsələyə görə əvvəlcə Səhiyyə Nazirliyinin əməkdaşı Zamirə Adilova, daha sonra Sumqayıt TƏBİB-in nümayəndələri ilə əlaqə saxlanılıb. Paşayev bildirir ki, məsul şəxslər bunu texniki səhv kimi qiymətləndirib, qısa müddətdə düzəldiləcəyini deyiblər. Lakin problemin iki aya yaxındır aradan qaldırılmadığını vurğulayıb.
Jurnalist vəziyyətin həm ailəsinə psixoloji təsir etdiyini, həm də bu cür xəstəliklərin elektron sistemə daxil edilməsinin beynəlxalq səviyyədə müəyyən prosedurlara səbəb ola biləcəyini qeyd edib. O, məsələ ilə bağlı Baş Prokurorluq, Dövlət Təhlükəsizliyi Xidməti, İcbari Tibbi Sığorta üzrə Dövlət Agentliyi və Səhiyyə Nazirliyini araşdırma aparmağa çağırıb.
Paşayev bildirib ki, məsələ həll olunmadığı təqdirdə, Azərbaycan Respublikasının ali rəhbərliyinə rəsmi qaydada müraciət edəcək.
