Bu ilin yanvar-oktyabr aylarında Azərbaycana 3 milyard 594,3 milyon manat dəyərində yeyinti məhsulları idxal olunub.
1xeber.media Yeniavaz.com-a istinadla xəbər verir ki, ötən ilin eyni dövrü ilə müqayisədə ərzaq məhsullarının idxalı artıb.
Belə ki, ötən ilin ilk 10 ayında xaricdən ölkəyə 3 milyard 349,8 milyon manat dəyərində yeyinti məhsulları gətirilib. Ən çox idxal olunan məhsullar arasında dəyər baxımından meyvə-tərəvəz, miqdar baxımından isə buğda üstünlük təşkil edib.
Qeyd edək ki, bu ilin ilk 10 ayında Azərbaycana 299,2 min ton tərəvəz və meyvə idxal edilib, bunun gömrük dəyəri 416 milyon manat olub. Nəticədə idxal olunan meyvə-tərəvəzin 1 kiloqramının orta qiyməti 1,30 manat təşkil edib.
Bundan başqa, 1 milyon 9,6 min ton buğda ölkəyə gətirilib və dəyəri 370,1 milyon manat olub. Bu zaman buğdanın 1 kiloqramının gömrük dəyəri 0,37 manata bərabər olub.
Həmçinin 153,2 milyon manat dəyərinə 38,6 min ton ət idxal olunub. Bunun da 1 kiloqramının orta gömrük dəyəri 3,5 manat olub.
13,7 min ton süd və qaymaq idxalının dəyəri isə 41,9 milyon manat olub və 1 kiloqram üçün qiymət 2,9 manat təşkil edib.
21,5 min ton kərə yağının idxalı üçün 251,8 milyon manat ödənilib və 1 kiloqramın orta gömrük dəyəri 11,5 manat olub.
Eyni zamanda, 11,6 min ton çay idxalının dəyəri 121,2 milyon manat (1 kiloqram üçün orta qiymət 11 manat), 45,6 min ton düyü idxalı 71,4 milyon manat (1 kiloqramın gömrük dəyəri 1,6 manat), 133,6 min ton bitki mənşəli yağların gömrük dəyəri 342,5 milyon manat (1 kiloqram üçün qiymət 2,6 manat) təşkil edib.
